Lefter Koka është arrestuar nga Policia e Shtetit paraditen e sotme. Siç është bërë me dije tashmë arrestimi i tij ka lidhje me kallëzimin penal të bërë në SPAK nga PD, LSI, për dosjen e të ashtuquajturës “afera korruptive e inceneratorëve”, një çështje kjo që ndonëse e shpërthyer e prej muajsh vijon të mbetet e freskët. Mirëpo kush është Lefter Koka, njeriu që nga një “durrsak i pandjerë”, ja doli të ngjitet në majat e pushtet-politikës për të përfunduar më së fundin në qelitë e burgut?
Lefter Koka i hyri politikës në vitin 2003, kur u përzgjodh personalisht nga Fatos Nano, ish-Kryetar i PS dhe ish-Kryeministër, si kandidat të socialistëve për Bashkinë e Durrësit. Megjithse fare i pandjerë për ndonjë veprimtari, falë miqësisë proverbiale të vëllait të tij Leonard (Nar) Koka, me Fatos Nanon, Lefteri (Teri), u caktua të jetë kandidat i PS-së për kryebashkiak i Durrësit, përballë Avni Hoxhës së PD. Në një garë shumë të kontestuar, Koka arriti të marrë mandatin e Kryebashkiakut, post që e mbajti deri në vitin 2007.
Në foto: Lefter Koka dhe Fatos Nano.
Pas largimit të Fatos Nanos nga kryesimi i PS-së dhe ardhjes së Edi Ramës në krye të kësaj partie, një ftohje u vërejt midis Lefter Kokës me socialistët, edhe pse ai vijoi të ushtroj detyrën si kryebashkiak i Durrësit.
Me përfundimin e mandatit, Lefter Koka u afrua me LSI-në e drejtuar nga Ilir Meta, ndërsa Edi Rama nxitoi ta zëvendësonte me Vangjush Dakon, i cili mori mandatin e Kryebashikaut të Durrësit.
Ndërkohë në vitin 209, Lefter Koka, kandidoi për deputet në Qarkun e Durrësit, nën logon e LSI dhe e fitoi mandatin e deputetit edhe në zgjedhjet parlamentare të 2013-tës.
Me dy mandate deputeti dhe me suportin e LSI, ai u mandatua edhe si ministër i Mjedisit në qeverinë e parë të Edi Ramës. Lefter Koka ja doli të rizgjidhej deputet edhe në vitin 2017 dhe nuk pranoi të hiqte dorë nga mandati i tij në vitin 2019, kur subjekti politik ku ai aderonte, pra LSI, në kuadër të aksionit politik, dogji mandatet parlamentare.
Në foto: Lefter Koka dhe Ilir Meta.
Në SPAK, Lefter Kokën e paditi forca politike ku militonte në fillim, Lëvizja Socialiste për Integrim, ndërkohë që një depozitim padie për lejet e dhëna për ndërtimin e impianteve për trajtimin e mbetjeve në Tiranë, Fier dhe Elbasan, kishte bërë edhe PD.
Sot Koka u arrestua me urdhër të SPAK pikërisht lidhur me inceneratorët, një aferë e denoncuar publikisht edhe nga shoqëria civile, edhe nga media edhe nga opozita në tërësi. Mbi të rëndojnë tre akuza të renda, përkatësisht: “shpërdorim detyre, pastrim parash dhe korrupsion”./ Arberia News. net
