Presidenti amerikan, Joe Biden, nuk do t’i përgjigjet akuzave të homologut rus, Vladimir Putin. Ishte ky reagimi i perëndimit ndaj fjalimit të shefit të Kremlinit në parlamentin rus.
Këshilltari për sigurinë kombëtare në Shtetet e Bashkuara, Jake Sullivan, tha se Uashingtoni nuk e vlerëson fjalimin si një përballje kokë më kokë, apo sfidë oratorie.
“Presidenti Biden, në fjalimin e tij në Varshavë, do të ofrojë një konfirmim për vlerat perëndimore”, nënvizoi zyrtari.
Sullivan iu përgjigj Putinit duke thënë se akuza e tij se perëndimi po sulmon Rusinë, është një absurditet.
Në këtë debat në distancë ka ndërhyrë dhe Sekretari Amerikan I Shtetit, Antony Blinken, i cili nga Athina deklaroi se lufta e Putinit ishte një dështim strategjik.
Nga ana tjetër, fjalimi i Biden në Poloni po pritet me mjaft kureshtje në Kremlin. Këtë e konfirmoi zëdhënësi Dmitry Peskov, që saktësoi se Putini nuk do të jetë mes atyre që do e ndjekin, por këshilltarët e tij.
“Presidenti do të informohet vetëm për pikat kryesore të fjalimit”, nënvizoi zëdhënësi i Kremlinit.
