Tepër i ashpër ka qenë reagimi i Kryeministrit shqiptar, Edi Rama për sa i përket debatit për ardhjen e artistit me origjinë serbe, Goran Bregoviç për të kënduar në “Festën e Birrës” në Korçë mbrëmjen e djeshme.
Në një postim të gjatë në Facebook, Kryeministri Rama nuk i ka kursyer për shqiptarët që ishin kundër kësaj ardhjeje, për të cilët tha se treguan një histeri fashiste.
Rama nuk ngurroi ta quante edhe të turpshme këtë ‘histeri’ sipas tij, duke shtuar se trajtimi i Bregoviç si kriminel lufte nuk është asgjë më pak apo më shumë sesa ajo që bëjnë serbët duke u hakërryer me fjalë të ndyra në rrjetet sociale të Dua Lipës.
Më tej, Kryeministri Rama thotë se Bregovic është një nga muzikantët më të jashtëzakonshëm të Ballkanit, i cili sipas Ramës nuk është serb dhe nuk ka qenë kurrë mbështetës i regjimit të Millosheviçit.
Kryeministri foli dhe për një “zjarrnxitës mendjefikur”, i cili sipas Ramës ka thënë që “Më pëlqen ta dëgjoj Bregoviçin, po nuk shoh dot me sy Edi Ramën!”.
Reagimi i plote:
Një gazetare e mirënjohur shqiptare e Kosovës, e cila respektohet ndërkombëtarisht dhe kontribuon për tribuna prestigjoze të shtypit botëror, e tha shumë troç se Goran Bregoviçi nuk ka asnjë lidhje, me asnjë prej të zezave që iu faturuan nga zjarrnxitës mendjefikur, sa në Prishtinë dhe sa në Tiranë.
Por muzikanti i famshëm nga Sarajeva, me baba kroat, nënë serbe dhe grua muslimane boshnjake, u kthye në një “kriminel serb” që duhej djegur në zjarret e gushtit shqiptar, pavarësisht se as serb nuk është përveç të tjerash. Paçka se Bregoviçi nuk ka thënë asgjë kundër shqiptarëve, nuk i ka kënduar asfare masakrave të regjimit të Millosheviçit dhe nuk ka qenë gjëkundi mbështetës i atij regjimi as me fjalë as me vepra, e vërteta as që kishte rëndësi. Rëndësi kishte zjarri i politikës qorre, e cila krijon armiq, ushqehet armiqësisht dhe jeton për armiqësinë – thënë aq bukur nga një prej zjarrnxitësve mendjefikur, “Më pëlqen ta dëgjoj Bregoviçin, po nuk shoh dot me sy Edi Ramën!”.
Askush, hiç askund, nuk e dha asnjë provë të vetme për ta justifikuar histerinë mesjetare që shpërtheu kundër një muzikanti nga më të jashtëzakonshmit e Ballkanit. Ishte një histeri fashiste, e turpshme per qytetarinë europiane të shqiptarëve, për historinë dhe për traditën tonë po ashtu, e cila fatkeqësisht nuk dallonte aspak nga histeritë linçuese të grupeve fashiste kudo në botë.
Ku ndryshojnë për shembull ata që në Serbi i hakërrehen me fjalorin më të ndyrë Dua Lipës në rrjetet e saj sociale, vetëm pse ajo është një shqiptare krenare e Kosovës, e cila del mbështjellë me të dy flamujt e shteteve tona, me ata që iu hakërryen me shqipen më të ulët në rrjetet tona sociale Goran Bregoviçit, duke e trajtuar si një kriminel lufte e duke i mveshur faje që ai nuk i ka bërë vetëm se ai këndon serbisht?
Ndryshojnë vetëm në faktin se të parët shajnë e mallkojnë serbisht, ndërsa të dytët sharjet e mallkimet i lëshojnë në shqip. Të dyja palët i përkasin besnikërisht kategorisë së ulët njerëzore të urrejtësve të verbër, të cilës kjo botë i ka parë vetëm sherrin, kudo e kurdo që ajo ka arritur të imponojë mbi shoqërinë verbërinë e vet.
Këngëtari Goran Bregoviç këndoi mbrëmjen e djeshme në Festën e Birrës në Korçë, pavarësisht shumë kundërshtive që pati kryesisht në rrjetet sociale të shumë shqiptarëve. Gjatë koncertit kur po perforomonte Bregoviç nuk munguan as incidentet. Një gazlotsjellës ju hodh turmës së pranishme nga një person që më vonë u identifikua si Redon Leka nga Tirana.
