Dy janë pistat ku po hetojnë policia dhe prokuroria lidhur me vrasjen e biznesmenit Bledar Muça në Lushnje, një ditë më parë.
Sipas raportimeve, pista e parë është ajo e prishjes së mundshme të pazareve të drogës, ndërsa pista e dytë e hetimit është ajo e lidhjeve familjare të viktimës me Roland Shytin, anëtarin e grupit të “Hakmarrjes për Drejtësi”.
Muça ishte i martuar me mbesën e Roland Shytit, personazh i dosjes “Hakmarrja për Drejtësi” i njohur me nofkën “Mustaqekuqi”.
Si ndodhi atentati?
Mësohet se ndaj Muçës është qëlluar 21 herë me breshëri kallashnikovi. Autorët e krimit, të cilët nuk janë identifikuar akoma, kanë qëlluar në lëvizje nga makina e tyre tip “Golf”, pasi kanë hapur xhamin.
Plumbat kanë kapur edhe 5 persona të tjerë, mes tyre 3 gra. Momentin e atentati, viktima po pinte kafe me kunatin e tij, Judin Velo, i cili është në gjendje të rëndë për jetën.
Disa minuta pas ngjarjes policia gjeti të djegur një makinë në fshatin Thanasaj, që dyshohet se është e autorëve të vrasjes. Brenda automjetit u gjet edhe një armë tip kallashnikov.
Kush ishte Bledar Muça?
Bledar Muça nuk njihej si person problematik në Lushnje. Lindur dhe rritur në fshatin Dushk të Lushnjes, ai vitet e fundit ka administruar disa biznese, si pika llotosh dhe lokale, por ka qenë edhe administrator i tregut të Lushnjes. Muça ishte i martuar dhe kishte një fëmijë.
