Ambasadori i BE-së në vendin tonë Luigi Soreca ka qenë sot në një vizitë në Korçë, ku është pyetur nga gazetarët në lidhje me ish-kryeministrin Sali Berisha, dhe pjesëmarrjen e tij në zgjedhjet e 6 Marsit.
Soreca tha se BE e ka thënë dhe më parë që nuk kometon dhe nuk ndërhyn në çështjet e brendshme të partive politike.
Gazetari: Berisha nuk është tërhequr nga politika dhe pse është shpallur ‘non grata’ nga SHBA, si e komentoni?
Soreca: Nuk dua të komentoj zhvillimet e brendshme të partisë, ne nuk kemi ndërhyrë ndonjëherë. Do të vazhdojmë punën tonë për të gjitha çështjet që kanë të bëjnë me të ardhmen e vendit sidomos me procesin e vettingut.
Ndërkohë që ambasadori i BE-së mbajti pothuajse një qëndrim të ngjashëm kur u pyet për dënimin me burg të Saimir Tahirit, për të cilin tha se nuk do të dontë që të komentonte qëndrimin e Gjykatave.
Sipas Sorecës BE ka mbështetur dhe do të vijojë të mbështesë Reformën në Drejtësi, ndërsa përshëndeti zgjatjen e afateve të Vetingut.
Në ndryshim nga ambasadorja e SHBA-së që ka qenë e prerë në qëndrimin e saj për Berishën, Soreca dhe në deklarata të mëparshme ka thënë se BE do të vazhdojë bashkëpunimin me PD, pavarësisht se kush do të jetë kryetari.
