Aktori i famshëm amerikan, Will Smith, ka vendosur që të japë dorëheqje nga Akademia Oscars, pasi goditi me shpullë komedianin e njohur, Chris Rock. Ky i fundit po drejtonte ndarjen e Çmimeve Oscars kur bëri një batutë në lidhje me flokët e bashkëshortes së aktorit, e cila vuan nga alopecia.
“Veprimet e mia në edicionin e 94-të të Çmimeve Oscars ishin shokuese, të dhimbshme dhe të pafalshme”, tha aktori përmes një deklarate. Si pasojë, Akademia tha se ka pranuar dorëheqjen e tij dhe do të vazhdojë të “lëvizë përpara” me procedurat disiplinore.
Disa minuta pas incidentit të papritur, Smith fitoi çmimin për aktorin më të mirë në rolin e tij në filmin King Richard, ku ai portretizoi babanë e tenisteve Venus dhe Serena Williams.
Dorëheqja a Smith, sipas Hollywood Reporter, nënkupton se ai më nuk mund të votojë për Oscars, por mund të nominohet në të ardhmen dhe të mbajë çmimin që ka fituar.
“Lista e atyre që kam lënduar është e gjatë dhe përfshin Chris, familjen e tij, shumë nga miqtë dhe më të dashurit e mi, të gjithë ata që ishin të pranishëm dhe shikuesit që na shikonin nga shtëpia”, tha Smith në deklaratë.
“Kam tradhtuar besimin e Akademisë. Ua kam hequr të nominuarve dhe fituesve mundësinë e tyre për të festuar dhe për nderuar punën e tyre të jashtëzakonshme. Jam zemërthyer”, shtoi aktori amerikan.
Drejtori i Akamdemisë, David Rubin, tha se ka pranuar dorëheqjen e Smith dhe se do të vazhdojë me procedurat disiplinore.
Deri më tani ka pak persona që janë përjashtuar nga Oscars: Harvey Weinstein, Bill Cosb dhe Roman Polansky. Ende është e paqartë se çfarë masash disiplinore do të ndërmarrë Akademia ndaj Smith.
Akademia Oscars ka thënë se proceduarat do të vazhdojnë ndaj Smith, duke e lënë të hapur mundësinë që atij t’i merret Çmimi Oscar, edhe pse kjo thuhet se ka pak gjasa të ndodhë dhe ekziston mundësia që ai të mos lejohet të marrë pjesë në ceremonitë e ardhshme të Oscars.
