Kombëtarja shqiptare e futbollit nuk do të jetë e plotë në sfidën e parë të Ligës së Kombeve. Kombëtarja do të udhëtojë nesër drejt Islandës pa Armando Brojën dhe Myrto Uzunin në radhët e saj.
Lajmin e ka konfirmuar edhe FSHF e cila ka bërë të ditur se dy lojtarët do të mungojnë për këtë duel, por shpresohet të jenë të gatshëm për atë ndaj Izraelit në “Air Albania”.
Sipas FSHF, Broja ka rifilluar stërvitjen në klubin e Çelsit dhe është në kontakt me të. Por lojtari nuk është i gatshëm për të udhëtuar drejt Shqipërisë, pasi ka qenë pushim për më shumë se një javë si pasojë e COVID.
“Stafi i Kombëtares është në kontakte të vazhdueshme me klubin anglez për t’u përditësuar mbi gjendjen fizike të sulmuesit, i cili nuk mund të rikuperohet në kohë për ndeshjen e parë. Broja do t’i bashkohet përfaqësueses shqiptare në Durrës pas kthimit nga Islanda dhe stafi teknik shpreson që ai të jetë në gjendje optimale për të luajtur në dy sfidat ndaj Izraelit dhe Estonisë”, thekson FSHF.
Sa i përket Uzunit, dëmtimi i tij vazhdon të jetë shqetësues e kështu është preferuar që ai të lihet pushim për ndeshjen e parë, që të vazhdojë të rikuperohet në Durrës për ndeshjen e dytë.
“Myrto Uzuni ka zhvilluar stërvitje të diferencuar për shkak se vuan nga një dëmtim në kavilje dhe stafi mjekësor, pas konsultimeve ka vendosur që lojtari të qëndrojë në Shqipëri dhe të vijojë me rikuperimin. Kësisoj, sulmuesi nuk do të jetë për ndeshjen e parë, ndërsa stafi shpreson ta ketë të gatshëm për sfidën me Izraelin”, shkruhet në njoftimin e FSHF.
