Një studim i ri ka treguar se akullnajat zvicerane kanë humbur gjysmën e vëllimit të tyre që nga viti 1931.
Studimi gjithashtu vuri në dukje se procesi nuk tregon shenja të ngadalësimit dhe studiuesit thonë se tërheqja e akullnajës po “përshpejtohet”, shkruan Deutsche Welle.
Një studim i 1400 akullnajave zvicerane zbuloi se ato po humbasin vëllimin dhe procesi duket se është përshpejtuar vitet e fundit.
Universiteti ETH i Cyrihut dhe Instituti Federal Zviceran për Kërkimet e Pyjeve, Borës dhe Peizazhit publikuan gjetjet e tyre bazuar në ndryshimet topografike të akullnajës që nga viti 1931.
Studiuesit zbuluan se vëllimi i akullit ishte përgjysmuar gjatë 85 viteve të fundit, deri në vitin 2016, dhe që atëherë akullnajat janë tërhequr me 12 për qind shtesë.
“Tërheqja e akullnajave po përshpejtohet. Vëzhgimi nga afër i këtij fenomeni dhe dimensioneve të tij historike është i rëndësishëm sepse na lejon të përgjigjemi sesi akullnajat reagojnë ndaj ndryshimeve klimatike”, tha bashkëautori i studimit Daniel Farinotti.
Studimi i tyre, i botuar në revistën shkencore The Cryosphere, përdori materiale nga arkivi i imazheve TerrA, i cili mbulon pothuajse 86 për qind të zonës së akullnajave të Zvicrës, duke analizuar 21,700 fotografi të bëra midis viteve 1916 dhe 1947.
Jo të gjitha akullnajat po humbnin akullin në të njëjtin ritëm, thanë studiuesit.
Lartësia, sasia e mbeturinave në akullnajë dhe rrafshimi i pjesës së saj më të ulët dhe më të prekshme ndaj shkrirjes ndikojnë në shkallën e tërheqjes.
Studiuesit zbuluan gjithashtu se dy periudha, vitet 1920 dhe 1980, panë rritje sporadike në masën e akullnajave, por kjo ishte e parëndësishme në krahasim me trendin e shkrirjes.
