Nga Bahri Cani
Përzierja e Elon Musk në fushatën elektorale në Gjermani është pritur shumë keq nga të gjitha partitë tjera, përveç AfD-së, të cilën e ka mbështetur ai. Musk tha se “vetëm AfD mund të shpëtojë Gjermaninë”, që është një përzierje e drejtpërdrejtë në fushatën elektorale, kur dihet fuqia e tij ekonomike por edhe posti i ri në administratën e Trumpit. A do të thotë kjo se edhe Trumpi mendon si Musk? Apo Musk ka vepruar thjesht kokë më vete? Një pyetje shumë me rëndësi kur dihet partneriteti shumë i ngushtë mes SHBA dhe Gjermanisë. Musk është njeriu më i pasur në botë, është njeriu që ka ndihmuar shumë Trumpin në zgjedhje dhe është një person me influencë mbarëbotërore. Por sa e lejueshme është përzierja e tij në zgjedhjet e një vendi tjetër demokratik? Elon Musk edhe më parë i ka lejuar vetes deklarata shumë brutale, të pamatura, duke e quajtur kancelarin Scholz “budalla”. Ne mund të kemi mendime të ndryshme për politikën e Scholzit, por ta quash një kancelar të një shteti kaq të madh kështu, me siguri që nuk është në rregull. Në Gjermani është gati e sigurt se do të ketë një qeveri pa AfD, pavarësisht mbështetjes së Elon Musk, sepse asnjë parti në Gjermani nuk do të bashkëpunojë me AfD. Por a do të ndikojë kjo mbështetje edhe më shumë në raportet me SHBA-në, të cilat edhe ashtu nuk do të jenë të lehta pas ardhjes së Trumpit në pushtet? Musk mund të mendojë privatisht çfarë të dojë, por deklaratat e tilla, për një vend kaq të madh dhe kaq me influencë në botë, për një vend që ka raporte kaq të mira me Amerikën, nuk janë në rregull. Mendoj unë!
