Largimet e disa prej lojtarëve më me peshë tek klubi i Partizanit, si Arinaldo Rrapaj, Andi Hadroj, Tedi Cara, dhe Kristian Mba, të katërt të transferuar në Ukrainë me ekipe të ndryshme, ka ndezur disa “pakënaqësi” tek tifozeria, madje dhe tek trajneri i të kuqve që në konferencën e fundit për shtyp, ishte dukshëm kundër tyre për këto lëvizje. E parë nga kjo anë nuk mund të thuhet që këto palë nuk është se nuk kanë të drejtë, por nga krahu tjetër këto transferime në këtë periudhë merkato dhe me përfitime të jashtëzakonshme për klubin janë një sukses historik, që asnjë ekip shqiptar nuk e ka bërë, aq më tepër në janar.
Në një kampionat thuajse të falimentuar, ku të ardhurat nga reklamat, biletat, e drejta televizive, sponsorat, nga FSHF-ja, janë thuajse qesharake në krahasim me shpenzimet që bën një president klubi dhe aq me tepër një ekip pretendent si Partizanit, ndaj shitja e lojtarvë është një aftësi dhe bonus i artë për ta nxjerrë klubin në fund të sezonit pa humbje.
Presidenti i Partizanit, Gaz Demi, ka bërë një tjetër lëvizje të bujshme në futbollin shqiptar, duke vendosur një rekord të ri në historinë e klubit dhe të kampionatit tonë. Klubi i kuq ka arritur të përfitojë rreth 1.4 milionë euro nga shitja e katër prej lojtarëve të tij në tregun ndërkombëtar, një arritje e paprecedentë që reflekton vizionin dhe strategjinë e qëndrueshme të drejtuesve.
Këto transferime tregojnë përkushtimin e Partizanit për të promovuar dhe zhvilluar talentet e tij, duke siguruar jo vetëm sukses sportiv, por edhe financiar.
Burimet konfirmojnë se lëvizjet janë realizuar me negociata të kujdesshme, ku klubi ka arritur të maksimizojë vlerën e lojtarëve të tij në tregun ndërkombëtar, çka përbën një model për klubet e tjera shqiptare.
Ky rekord vjen si pjesë e një filozofie të qartë të presidentit, i cili ka vendosur të ndërtojë një Partizan që jo vetëm konkurron në fushë, por edhe forcohet ekonomikisht. Tifozët e Partizanit tani jo vetëm që shijojnë sukseset sportive, por edhe krenohen me faktin që klubi po përparon drejt një modeli të qëndrueshëm dhe modern të menaxhimit.
Me këtë arritje, Partizani konfirmon statusin e tij si një prej klubeve më të organizuar në vend, duke hedhur bazat për një të ardhme edhe më të suksesshme. (TemA)
