Ekspozita hapet me datë 4 shkurt dhe do të vazhdojë përgjatë gjithë muajit. Duke qenë se shkurti është edhe muaji i ditës së Shën Valentinit, festës së dashurisë, organizatorët e kësaj ekspozite kanë menduar që në “Shtëpinë Studio Agolli”, më specifikisht në një kënd të saj, çdo admirues i letërsisë së tij, i cili do ta vizitojë atë, mund të shkruajë edhe ai një letër dashurie me stilografin origjinal të shkrimtarit.
Në 93-vjetorin e lindjes së shkrimtarit, Bashkia e Tiranës çeli mjediset e “Shtëpisë Studio Agolli”, si pjesë e strukturës muzeu vendor “Shtëpia Studio Kadare-Agolli”. Muzeu kushtuar shkrimtarit Dritëro Agolli prezanton një pjesë të historisë dhe kulturës materiale e shpirtërore, duke pasqyruar jetesën e shkrimtarit shumë të njohur për publikun, si brenda edhe jashtë vendit.
Dritëro Agolli ka qenë poet, prozator, gazetar dhe publicist i njohur. Ai la pas një krijimtari mjaft të gjerë me poezi, poema, tregime, novela, romane, drama, skenarë filmash etj. Disa prej veprave më të rëndësishme të tij janë përkthyer në shumë gjuhë të botës. Ai u nda nga jeta në moshën 86-vjeçare, në shkurt të vitit 2017 në Tiranë.
