Një ngjarje e rëndë tronditi Romën, pasi 22-vjeçarja shqiptare, Ilaria Sula, e cila ishte shpallur e zhdukur që prej 25 marsit të këtij viti, u gjet e vrarë brenda një valixhe të hedhur në një greminë.
Babai i Ilaria Sulës, Flamur Sula, ka treguar se pas një telefonate të fundit me të bijën, ajo nuk e kishte telefonuar më si zakonisht.
Më pas ai kishte zhvilluar biseda përmes mesazheve, gjë që e kishte bërë të dyshonte se diçka nuk shkonte, pavarësisht se Ilaria i shkruante se ishte mirë.
Po ashtu Flamur Sula ka rrëfyer bisedën e tij me të dashurin e vajzës pas humbjes së saj. Ai tregoi se u takuan me të dashurin e Ilaria-s në komisariat, pas kallëzimit për zhdukjen e vajzës. I dashuri i saj iu shpreh shumë i pikëlluar dhe i tha se ishte i shqetësuar për zhdukjen e saj, madje e përqafoi dhe dukej i qetë.
Pretendimi i vrasësit para babait të Ilarias
Në një rrëfim të dhënë në programin “Chi l’ha Visto?”, Flamur Sula tregoi se ishte një histori që e tronditi thellë. Ai përmendi bisedën e fundit me vajzën e tij, ku Ilaria i tha se do të kthehej të shtunën dhe se ishte mirë, por më pas dërgoi vetëm mesazhe, duke i thënë “Mos u shqetëso, jam mirë”. Kjo i kishte ngritur dyshime, pasi në çdo rast tjetër vajza e tij do të kishte telefonuar personalisht.
Sipas babait të saj, mesazhet që vajza kishte dërguar ishin të pazakonta dhe kishin lënë të kuptohej se diçka nuk ishte në rregull. Me këtë shqetësim, ata bënë kallëzim për zhdukjen e vajzës. Më pas, të dielën, u takuan me të dashurin e Ilarias në komisariat, ku ai u shpreh i shqetësuar dhe i pikëlluar madje dhe e përqafoi.
Trupi i Ilaria Sulës i gjetur në një valixhe
Në mëngjesin e sotëm, trupi i Ilaria-s u gjet në një zonë pyjore, brenda një valixheje të hedhur në një përroskë, në juglindje të Romës. Trupi i saj kishte vdekur të paktën 48 orë përpara se të gjendej. Zëvendësprokurori Giuseppe Cascini do të caktojë nesër ekipin mjeko-ligjor që do të kryejë autopsinë.
Ish-i dashuri i Ilaria-s, Mark Antony Samson, arrestohet
Ish-i dashuri i Ilaria-s, filipinezi Mark Antony Samson, është arrestuar dhe po mbahet në komisariat. Ai ka treguar se e kishte ngarkuar trupin e saj në makinë, e kishte mbyllur në një valixhe dhe e kishte hedhur poshtë një shkëmbi. Ai ka deklaruar gjithashtu se ka hedhur thikën që përdori për vrasjen në një kazan në lagjen Monte Sacro, ndërsa telefonin e Ilarias në një pusetë dhe ende nuk është gjetur.
Hetimet janë në vazhdim ndërsa është raportuar se babai dhe nëna e Mark Antony Samson nuk janë përfshirë në hetim.
Reagimi i vëllait të Ilaria-s
Vëllai i Ilarias, Leoni, ka shprehur zemërimin e tij ndaj ngjarjes. Ai tha se ishte i habitur nga veprimi i të dashurit të motrës së tij dhe nuk kupton se përse ai e bëri këtë. Leoni përmendi se Ilaria kishte ardhur në Terni për t’i vizituar disa javë më parë dhe ishte e qetë, pa i treguar asnjë shqetësim. Ai ka theksuar se mesazhet që ka dërguar më vonë nuk janë të sigurt që i ka shkruar ajo.
Trupi i Ilarias tani ndodhet në Institutin e Mjekësisë Ligjore të Universitetit La Sapienza, ku do të kryhet autopsia për të sqaruar shkaqet e vdekjes së saj.
