“Ndryshimi i klimës dhe biodiversiteti nuk janë çështje perceptimi, pasi shkenca është mjaft e qartë për to”, tha dje, të mërkurën (24/9), Presidenti francez Emmanuel Macron, duke iu përgjigjur tërthorazi homologut të tij amerikan, Donald Trump, i cili të martën tallte vlerësimet e komunitetit shkencor për klimën.
“Shkenca duhet të mbetet në zemër të vëzhgimeve dhe politikave tona”, këmbënguli presidenti francez gjatë një mini-sesioni të posaçëm mbi klimën të mbajtur në margjinat e Asamblesë së Përgjithshme të OKB-së në Nju Jork.
“Ndonjëherë dëgjojmë deklarata që do të lejonin të rrënjosej ideja se çështjet e klimës ose çështjet e biodiversitetit janë disi çështje perceptimi, se shkenca nuk është aq e qartë”, tha Macron, pa përmendur askënd. “Unë ende besoj se shkenca është mjaft e qartë”, shtoi ai.
“Sidoqoftë, shkencëtarët e akredituar siç duhet, të njohur nga kolegët e tyre, nuk lënë asnjë dyshim. Pra, le të vazhdojmë t’i bazojmë vendimet tona në shkencë”, theksoi presidenti francez.
Emmanuel Macron ka bërë thirrje për vendosjen e objektivave detyrues për të kufizuar emetimet e metanit, duke nënvizuar se ky është një prioritet që ai do ta vendosë në G7, presidencën e së cilës Franca do të marrë vitin e ardhshëm.
Nga podiumi i Asamblesë së Përgjithshme të OKB-së, Presidenti i SHBA-së Donald Trump deklaroi të martën se ndryshimi i klimës ishte “mashtrimi më i madh” kundër botës.
