Ndërsa banorët e Vlorës vetëm shijojnë pamjen mrekullueshme që u fal Joni, të huajt që jetojnë në qytetin bregdetar pastrojnë plazhin, duke dhënë një mesazh për qytetarët e Vlorës dhe jo vetëm, për të mbajtur pastër ambientin dhe për të mbrojtur natyrën.
“Jam Daniel, vij nga Mbretëria e Bashkuar dhe prej dy muajsh jetoj në Vlorë, bashkë me djalin tim, Daniel Junior. Krejt rastësisht vendosëm të pastronim këtë zonë të plazhit. Personat që shihni sot në këtë aktivitet i kemi njohur përmes rrjeteve sociale dhe vendosëm që kjo ditë të ishte një ditë pastrimi”, tha Danieli.
“Jam Erica. Jam shpërngulur në Vlorë rreth katër ose pesë muaj më parë. Jemi pjesë e komunitetit të të huajve këtu dhe dikush nga komuniteti na kontaktoi për të na treguar se plazhi ishte ndotur pak pas stuhisë. U organizuam, kam sjellë vajzën, djalin dhe bashkëshortin tim dhe po japim ndihmën tonë. Ky është një vend shumë i bukur, vërtet i mrekullueshëm”, tha Erica.
“Më pëlqen shumë komuniteti këtu, është shumë mikpritës dhe i ngrohtë. Ndjeva se duhej ta bënim këtë për ta bërë këtë vend edhe më të mirë. Më pëlqen të bëj gjëra të mira, ashtu si edhe nëna ime. Mendoj se është një komunitet i shkëlqyer. Dhe i dua shumë edhe qentë endacakë këtu”, u shpreh një qytetare.
Kjo nismë e të huajve, më shumë se pastrimi i plazhit, më e rëndësishme ka mesazhin për të gjithë qytetarët që të kontribuojnë në zonat turistike dhe jo vetëm, për të mbajtur pastër mjedisin ku pushojmë apo edhe jetojmë.
