Presidenti amerikan Donald Trump ka deklaruar se nuk do të vendosë tarifat që ishin planifikuar të hynin në fuqi më 1 shkurt, pas një takimi që e ka cilësuar si “shumë produktiv” me Sekretarin e Përgjithshëm të NATO-s, Mark Rutte.
Në një postim në platformën Truth Social, Trump bëri të ditur se palët kanë formuar “kornizën e një marrëveshjeje të ardhshme në lidhje me Groenlandën”. Sipas tij, kjo marrëveshje, nëse finalizohet, do të jetë “një zgjidhje e shkëlqyer për Shtetet e Bashkuara të Amerikës dhe për të gjitha vendet e NATO-s”.
“Bazuar në këtë mirëkuptim, unë nuk do të vendos tarifat që ishin planifikuar të hynin në fuqi më 1 shkurt”, shkruan Trump, duke shtuar se po zhvillohen diskutime të mëtejshme lidhur me të ashtuquajturën “Kupola e Artë” në raport me Groenlandën.
Trump njoftoi gjithashtu se negociatat do të udhëhiqen nga Zëvendëspresidenti JD Vance, Sekretari i Shtetit Marco Rubio, i Dërguari Special Steve Witkoff dhe zyrtarë të tjerë, të cilët do t’i raportojnë drejtpërdrejt atij.
“Informacion i mëtejshëm do të vihet në dispozicion ndërsa diskutimet përparojnë”, përfundon ai mesazhin e tij.
