Nga Fron NAHZI * –
Fjalët nuk mjaftojnë. Politikanët shqiptarë duhet të kuptojnë se do të përballen me pasoja, nëse shmangin ankesat e SHBA-së për korrupsion të nivelit të lartë.
Zëvendës Ndihmës Sekretari Amerikan i Shtetit Gabriel Escobar vizitoi Shqipërinë, një aleat i ngushtë i Uashingtonit në një rajon gjithnjë e më të brishtë. Mesazhet që ai jep dhe qasja që SHBA-ja ka, mund të kenë një ndikim të jashtëzakonshëm pozitiv në këtë shtet të vogël, por strategjik ballkanik.
Çështja kryesore është korrupsioni dhe si ai të luftohet në mënyrë efektive në një vend, tranzicioni 30-vjeçar i të cilit nga komunizmi është dëmtuar dhe devijuar nga korrupsioni i përhapur dhe i nivelit të lartë.
SHBA-ja me të drejtë ka mbajtur një qëndrim të zëshëm për këtë çështje, por duhet të ushtrojë presion në mënyrë të barabartë ndaj të gjitha partive dhe politikanëve të vendit. Dështimi për ta bërë këtë do të gërryejë më tej ndikimin në rënie të Uashingtonit.
Pak njerëz në SHBA ose jashtë saj morën parasysh memorandumin e presidentit Joe Biden për të luftuar korrupsionin në nivel global – derisa administrata filloi t’i shpallte ish-udhëheqësit botërorë persona non grata.
Në Shqipëri, SHBA-ja e kishte kritikuar vazhdimisht qeverinë socialiste të kryeministrit Edi Rama për korrupsionin, duke e quajtur atë “të përhapur në të gjitha degët e qeverisë”, veçanërisht në gjyqësor.
Ajo thotë se Rama është përpjekur më tej “të ushtrojë presion të drejtpërdrejtë dhe të tërthortë politik dhe ekonomik mbi median, duke përfshirë kërcënimet dhe dhunën ndaj gazetarëve që përpiqeshin të hetonin krimin dhe korrupsionin”.
Fjalët e forta kanë pasur pak efekt. Liderët e Shqipërisë kanë mësuar të manovrojnë në situata të vështura, duke gjetur ngushëllim në pellgjet e qeta të vizitave shtetërore dhe garancive diplomatike në Evropë dhe Shtetet e Bashkuara.
Në fund të fundit, me kërkesë të Uashingtonit, Shqipëria priti të burgosur të liruar të Guantanamos dhe, në vitin 2018, u ofrua si një strehë e sigurt për Muxhahedinët. Së fundmi, Shqipëria ishte një nga vendet e pakta që pranoi afganët që ikin nga pushtimi i talebanëve.
Gjatë zgjedhjeve të fundit parlamentare në Shqipëri në prill, ambasadorja e SHBA-së Yuri Kim i befasoi të gjithë kur akuzoi hapur Tom Doshin, një aleat të Ramës dhe kryetar i Partisë Socialdemokrate, për “korrupsion madhor” dhe u kërkoi shqiptarëve të mos votonin për të.
Në të kaluarën, një deklaratë e tillë do t’i jepte fund karrierës politike të një shqiptari. Në vend të kësaj, partia e Doshit fitoi tre vende në parlament, duke e bërë atë partinë e katërt më të madhe në parlament. Nën presionin e SHBA-së, Rama e detyroi Doshin të jepte dorëheqjen, por ndikimi i tij mbetet.
Përveç një grushti ekspertësh ballkanas, një numër i vogël njerëzish i kushtuan vëmendje shtysës kundër korrupsionit të Uashingtonit.
Kjo deri në maj, kur SHBA-ja sanksionoi ish-presidentin Sali Berisha, 76 vjeç, dhe familjen e tij për “korrupsion madhor”, duke i ndaluar hyrjen në vend.
Një funksionar dikur komunist dhe lideri i mëparshëm i Partisë Demokratike të qendrës së djathtë, Berisha akuzoi ambasadoren e SHBA-së dhe anëtarët kryesorë të administratës Biden se e kanë vënë në shënjestër për shkak të politikës së tij të prirur nga e djathta, dhe se janë përkulur ndaj të ashtuquajturës axhendë anti-konservatore të George Soros. Pretendimet gjetën mbështetje midis liderëve republikanë të SHBA-së dhe ish-zyrtarëve të Trump.
Richard Grenell, ish-Drejtori në detyrë i Inteligjencës Kombëtare dhe ish-ambasador i SHBA-së në Gjermani, nxitoi në mbrojtje të Berishës, duke akuzuar Sekretarin e Shtetit Blinken se po sillej si agjent i Sorosit. Kongresmeni Lee Zeldin, një anëtar i Komitetit të Punëve të Jashtme të Dhomës së Përfaqësuesve, kërkoi informacione të detajuara nga Blinken mbi akuzat për korrupsion kundër Berishës. Në një deklaratë për shtyp në nëntor, Zeldin e përshkroi Berishën si “një aleat të presidentit Bush dhe një kundërshtar të Partisë Demokratike dhe aktivistit progresist George Soros”.
Metoda më efektive për të zhbërë këtë fushatë dezinformimi është ndryshimi i narrativës.
Për këtë qëllim, Escobar duhet të dyfishojë kritikat e Departamentit të Shtetit dhe t’i bëjë të qartë kryeministrit Rama se ai do të përballet me pasoja se nuk po lufton vërtet korrupsionin dhe krimin e organizuar. Kjo jo vetëm që do të trajtojë fushatën e dezinformimit të ekstremit të djathtë, por do të forcojë pozicionin e SHBA-së në Shqipëri dhe rajon, ku korrupsioni është i shfrenuar – ndërkohë që forcon sundimin e ligjit./ Marrë nga BIRN-Titulli vjen i redaktuar nga Arberia News/
* Autori është Drejtori i Lartë i Zhvillimit Global në Institutin McCain për Lidership Ndërkombëtar në Universitetin Shtetëror të Arizonës.
