Ikona e filmit Arnold Schwarzenegger u thotë rusëve në një video të postuar në mediat sociale të enjten, se ata po gënjehen për luftën në Ukrainë dhe akuzoi presidentin Vladimir Putin, se ka sakrifikuar jetët e ushtarëve rusë për ambiciet e tij.
Schwarzenegger është jashtëzakonisht popullor në Rusi dhe, me sa duket, edhe për Putinin. Llogaria e Presidentit të Rusisë në Twitter ndjek vetëm 22 llogari – njëra prej tyre e aktorit.
Në videon nëntëminutëshe, Schwarzeneggeri thotë se ushtarëve rusë u ishte thënë se do të luftonin nazistët në Ukrainë, ose se po shkonin për të mbrojtur rusët etnikë në Ukrainë, apo për stërvitje ushtarake, dhe se ata do të përshëndeheshin si heronj. Ai thotë se shumë nga trupat tani e dinë se këto pretendime ishin të rreme.
“Kjo është një luftë e paligjshme,” thotë Schwarzeneggeri, duke parë drejt e në kamera, i ulur në një tavolinë në një dhomë leximi. “Jetët tuaja, gjymtyrët tuaja, e ardhmja juaj po sakrifikohen për një luftë të pakuptimtë, të dënuar nga e gjithë bota”.
Schwarzeneggeri e postoi videon e tij emocionale në Twitter, YouTube dhe Instagram. Ndërsa disa nga këto shërbime janë të bllokuara në Rusi, ai gjithashtu e postoi atë në aplikacionin e mesazheve Telegram, ku mori më shumë se gjysmë milioni shikime. Ajo u postua me titra në rusisht.
Ish-guvernatori i Kalifornisë solli kujtime të dhimbshme se si babai i tij u gënjye teksa luftonte me forcat e Adolf Hitlerit gjatë Luftës së Dytë Botërore dhe se si u kthye në Austri, një burrë i thyer, fizikisht dhe emocionalisht, pasi u plagos në Leningrad.
Ai u kërkoi rusëve që të informojnë bashkëqytetarët e tyre për “katastrofën njerëzore, që po ndodh në Ukrainë”. Videoja tregon ndërtesa të bombarduara në Ukrainë dhe njerëz që janë nën bombardimet ruse.
Më pas ai iu drejtua drejtpërdrejt Putinit, duke i thënë: “Ju e nisët këtë luftë. Ju jeni duke e udhëhequr këtë luftë. Ju mund ta ndaloni këtë luftë”.
Schwarzeneggeri përshkroi lidhjet e tij të gjata me Rusinë, pasi kishte shkuar atje si një sportist dhe hero filmash me aksion. Në vitin 2010, si guvernator i Kalifornisë, ai ishte në krye të një delegacioni të drejtuesve të biznesit dhe kapitalistëve të kompanive teknologjie në një udhëtim në Moskë.
Ai i quan të gjithë rusët që kanë dalë në rrugë për të protestuar kundër sulmit të Ukrainës dhe që janë arrestuar dhe keqtrajtuar, “heronjtë e mi të rinj”.
Një këshilltar i Ministrisë së Brendshme të Ukrainës, i cili punon për të shpërndarë informacione rreth rrjedhës së luftës, u bëri thirrje ukrainasve, që ta shpërndanin videon me miqtë dhe të afërmit në Rusi.
“Putini dhe propagandistët e tij na quajnë ukrainas fashistë dhe nazistë”, tha këshilltari, Anton Gerashchenko, në Telegram. “Por propaganda e tyre shpërbëhet kur njerëz super të famshëm në mbarë botën flasin me një zë: “Jo luftës!”
Gerashchenko ka më shumë se 385,000 abonentë në kanalin e tij në Telegram.
