Detaje të reja janë zbardhur lidhur me 38 vjeçarin Betim Kastrati, i cili u gjet i vdekur mbrëmë në rrethrrotullimin e Kolonjës të rrugës Lushnjë-Fier.
Burimë bëjnë me dije se Kastrati ishte shoferi personal i drejtorit të Portit të Durrësit, Pirro Vengu. Mjeti në fjalë që përdorte viktima jashtë orarit të punës kishte ardhur në Portin e Durrësit nga një tjetër institucion shtetëror në Tiranë.
Ai u gjet mbrëmjen e djeshme i pajetë në automjetin e tij të cilin e kishte parkuar në mënyrë të rregullt anash rrugës, dhe sipas policisë Kastrati kishte vrarë veten.
Por nga ana tjetër kolegët e punës nuk e besojnë faktin që kemi të bëjmë me një vetvrasje pasi ai nuk kishte shfaqur në asnjë moment shenja depresioni.
Vdekja e babait të dy fëmijëve është e mistershme dhe ende nuk dihet ekzaktësisht se çfarë ka ndodhur.
Burime bëjnë me dije se arma e gjetur brenda makinës është dërguar për ekspertim, për të parë nëse ka pasur apo jo shenja gishtash të personave të tjerë.
