Kryeministri i Shqipërisë, Edi Rama, gjatë një interviste ekskluzive për të përditshmen gjermane “Franfurter Rundschau”, e ka përshkruar si të “pashtershëm” durimin e shqiptarë për të aderuar në strukturat e Bashkimit Evropian, si pjesë integrale e kontinentit evropian.
“Durimi ynë është i pashtershëm mbi subjektin, sepse nuk kemi zgjidhje tjetër. Jemi mësuar me këtë gjë”, iu përgjigj Rama pyetjes së kryeredaktorit të “Frankfurter Rundschau”, Thomas Kaspar. “Kemi qenë gjithnjë loja e fuqive më të mëdha. Jemi vend i vogël e kemi vuajtur shumë, por tashmë e kemi një vullnet të lirë: Jemi evropianë dhe duam të bashkohemi me BE-në”.
Një paralelizëm, Rama e bën edhe me vetë evoluimin e tij personal ndër vite.
“Unë kam lindur si një person shumë i paduruar”, e përshkruan veten kreu i Qeverisë, duke vijuar të thotë se pikërisht ky padurim, e ka bërë atë të jetë jashtë gjërave për një periudhë të gjatë.
Mirëpo, politika, kërkon durim dhe politikanët e paduruar, janë të humbur që në nisje.
“Është një sipërmarrje herkuleane të drejtosh një parti”, vijon më tej ai, “sepse duhet të bashkosh interesa të ndryshëm”.
Kjo sipas kryeministrit, nuk ka të bëjë me artin dhe pikturën, por me ngjyrat, format dhe harmoninë. Në qeverisje, sipas tij, çdo lëvizje peneli është një person dhe kjo e bën gjënë shumë më të ndërlikuar.
Çështja e negociatave me BE-në, ka qenë sigurisht edhe pikë kyçe e bisedës që Rama ka zhvilluar.
Ai nuk është tërhequr nga deklaratat se “mënyra se si Bullgaria është marrë me çështjen e Maqedonisë së Veriut është një turp”.
Megjithatë, shpreson në një ndryshim së shpejti.
Sa i përket relatave me kancelarin gjerman, Olaf Scholz, ai është shprehur i kënaqur që në krye të Berlinit, ka ardhur një politikan, i cili ndan të njëjtin vizion me ish-kancelaren, Angela Merkel, sqimën për të cilën kryeministri kurrë nuk e ka fshehur.
“Merkel ishte e devotshme ndaj ‘Procesit të Berlinit’. Ne duam ta shtyjmë edhe më shumë këtë gjë. Ai proces ka ngecur, pasi eci mirë për pak. Edhe për faktin se BE-ja nuk ka bërë gjë për të”, iu referua Rama angazhimit më të madh të ish-kancelares në Ballkanin Perëndimor.
Ndërsa, mbi protestat në Tiranë apo largimin e popullsisë, ai foli me tone të moderuara, duke e përligjur të drejtën për të protestuare duke thënë se ikja e shqiptarëve nga vendi është alarmante.
Megjithatë, nuk e mohoi se hapa të mëdhenj përpara janë bërë për Shqipërinë. Përfshi këtu edhe në aspektin ekonomik, ku shteti ka inflacionin më të ulët në Ballkan edhe pas krizës së luftës në Ukrainë.
Kosova dhe rajoni
Një turp për BE-në. Kështu e ka përshkruar kreu i Qeverisë regjimin e vizave ndaj Kosovës, i cili ende vijon.
“Kosovarët janë të vetmit në kontinentin tonë, të cilëve nuk u lejohet të udhëtojnë”, theksoi Rama për të përditshmen gjermane. “Më parë, jetonin në ish-Jugosllavi e Serbi dhe kanë qenë të lirë të udhëtojnë. Po tani? Ata janë të lirë dhe të pavarur nga diktati, por çliruesit e tyre po i mbajnë sërish në një lloj burgu”.
Mbi relatat me presidentin serb. Aleksander Vuçiç, Rama ravijëzoi se shpesh nuk bie dakord me të. Megjithatë, kjo gjë, nuk e ndalon të ketë relata të mira me numrin një të Beogradit.
Një të metë gjithsesi, ja përkufizon të gjithë shtetit serb.
“Ne kemi vuajtur shumë nga ish-Bashkimi Sovjetik dhe historia e tregon këtë. Ndaj jemi pro-amerikanë. Serbia ka një histori tjetër, por Beogradi nuk e mbështet Putini. Një problem e ka Aleksandër Vuçiç atje; Ekonomia serbe është shumë e varur nga nafta dhe gazi rus”.
Kështu e përshkruan Rama situatën në rajon, duke bërë sërish thirrje për njohje gjithëpërfshirëse të Kosovës në çdo sferë ligjore, publike e sociale.
Teksa, në mbyllje, me nënqeshje, shpjegon se jetën post-politikë, e sheh si një stilist rrobash në Shqipëri.
Në një Shqipëri, të cilën kryeministri e përshkruan si “më të mërzitshme” për nga stabiliteti i lartë i jetës. Por jo aq të mërzitshme sa për ta lënë vendin.
