SPAK do të forcojë bashkëpunimin me prokuroritë ndërkombëtare si domosdoshmëri për të arritur suksesin në luftën nga krimit dhe korrupsionit.
Mesazhi u dha nga kreu i SPAK-ut, Arben Kraja, i cili ishte i pranishëm në ceremoninë e 20 vjetorit të Prokurorisë Federale të Belgjikës që u mbajt në Bruksel.
Vetë Kraja tha se SPAK do të forcojë bashkëpunimin për shkëmbim informacioni me prokurorinë belge dhe kjo duhet të jetë mesazh i qartë për shqiptarët me precedent në Belgjikë.
“Në sesion u diskutua përvoja 20-vjeçare e Prokurorisë Federale Belge. Të gjithë diskutantët ishin në një linjë, që krijimi dhe jetëgjatësia e një strukture prokurorie të specializuar dhe qendrore është e domosdoshme për të patur sukses në luftën kundër krimit të organizuar, pastrimit të parave dhe terrorizmit”, tha Kraja.
Kreu i SPAK theksoi se lufta kundër krimit të organizuar ndërkombëtar dhe terrorizmit është një betejë e gjatë dhe e vazhdueshme dhe duhet realizuar në bashkëpunim të ngushtë ndërmjet strukturave të zbatimit të ligjit.
Drejtuesi i SPAK zhvilloi takime edhe me personalitetet e ftuar dhe veçanërisht me drejtuesit e prokurorive prezente në takim, në kuadër të vendosjes së kontakteve të reja.
