Në një kohë ku në Presidencë prej dy ditësh po zhvillohen takime me forcat politike, Partia Socialiste ka theksuar se nuk ka një datë të preferuar për zgjedhjet vendore. Kjo është deklaruar nga vetë kreu i Grupit Parlamentar të PS-së Taulant Balla i cili u shpreh se data do të varet nga vlerësimi dhe gatishmëria e secilit aktor politik.
“Nuk kemi qenë të prerë në një propozim tonin, për këtë datë sepse besojmë që presidenti duhet të marrë në konsideratë të gjitha propozimet, ne jemi të gatshëm që të marrim në zgjedhje dhe t’i fitojmë ato në secilën datë, ajo që vërej me vlerësim është gatishmëria për të dëgjuar të gjithë aktorët politik që priten që të marrin pjesë në zgjedhje”, tha kreu i grupit parlamentar të PS-së, Taulant Balla.
Ai komentoi edhe takimin që Begaj bëri me përfaqësuesit e PD-së së Berishës.
“Nuk di se kë ka pritur Begajn, të gjithë respektojmë ligjin dhe në këtë këndvështrim, në Kuvendin e Shqipërisë kryetari i grupit parlamentar, janë Mediu, Doda, dhe Alibeaj, pastaj nëse deputet të caktuar kërkojnë takime me president të republikës, mendoj se edhe ndonjë deputet socialist mun të kërkoj takim me presidentit”, tha Balla.
