Nga Bari Cami
Shpallen rezultatet zyrtare përfundimtare në Gjermani
Pas ankesave, numërimeve e verifikimeve, tani dihet përfundimisht: Më së shumti vota në zgjedhjet parlamentare në Gjermani ka fituar Unioni CDU/CSU me 28,5 për qind.
Në vendin e dytë është AfD me 20,8%. Ndërsa e treta është SPD me 16,4 %. Në Bundestag janë futur edhe ekologjistët me 11,6 % dhe e Majta me 8,8 %.
Aleanca Sahra Wagenknecht BSW ka fituar 4,98% të votave dhe i kanë munguar vetëm rreth 9.500 vota për tu futur në Bundestag. Por BSW, sikur edhe liberalët FDP mbetet jashtë parlamentit.
Bundestagu gjerman do të ketë 630 deputetë: CDU/CSU 208, AfD 152, SPD 120, Grüne 85 dhe e Majta 64.
Një vend i takon edhe partisë së minoritetit danez SSW, në Schleswig-Holstein, për të cilën nuk vlenë pragu prej 5%.
Në këtë mënyrë marrin fund numërimet dhe verifikimet dhe shpallen si zyrtare rezultatet e zgjedhjeve të zhvilluara me 23 shkurt.
E gjithë procedura e votimit, numërimit, ankimimit dhe verifikimit të rreth 50 milionë votave përfundoi pra për vetëm tre javë.
Negociatat për koalicionin qeveritar mes CDU, CSU dhe SPD kanë filluar.
