Qeveria federale e Shteteve të Bashkuara ka hyrë zyrtarisht në mbyllje pas mesnatës së së mërkurës, pasi Kongresi nuk arriti të miratojë një ligj të ri për financimin e shpenzimeve shtetërore. Kjo është mbyllja e parë e qeverisë që nga viti 2018 dhe vjen si rezultat i dështimit për të arritur një marrëveshje mes republikanëve dhe demokratëve në Senat.
Mbyllja pritet të ketë pasoja të menjëhershme dhe të ndjeshme në funksionimin e administratës amerikane. Sipas Zyrës së Buxhetit të Kongresit (CBO), mbi 750 mijë punonjës federalë mund të futen në pushim pa pagë (“furlough”), ndërkohë që mijëra të tjerë do të detyrohen të vazhdojnë punën pa u paguar, përfshirë punonjësit e sigurisë kombëtare dhe ata në sektorë të tjerë jetikë.
Departamenti i Shëndetësisë dhe Shërbimeve Njerëzore njoftoi të martën se afro 41% e stafit të tij do të largohet nga puna përkohësisht. Gjithashtu, Agjencia Federale e Aviacionit ka bërë të ditur se mbi 11 mijë punonjës do të preken nga mbyllja, përfshirë teknikë të mirëmbajtjes dhe inspektorë të sigurisë së fluturimeve, çka mund të çojë në vonesa dhe anulime të shumta në transportin ajror.
Ndërkohë, dy sindikata federale kanë ngritur padi ndaj Zyrës së Menaxhimit të Buxhetit dhe Zyrës së Personelit Federal, duke i akuzuar për shkelje ligjore në urdhrat për shkarkime masive të punonjësve në prag të mbylljes. Sindikatat pretendojnë se këto masa janë të paligjshme dhe dëmtojnë të drejtat e punonjësve publikë.
Shërbime të rëndësishme publike, si administrata tatimore, programet e ndihmës sociale dhe dhënia e granteve për arsim e kërkime shkencore, pritet të ndalohen ose të reduktohen ndjeshëm gjatë kësaj periudhe. Megjithatë, pagesat për sigurimet shoqërore dhe operacionet e postës pritet të vazhdojnë, edhe pse me kapacitet të kufizuar.
Mungesa e një marrëveshjeje për buxhetin e shtetit u përshkallëzua pas debatit të ashpër mes republikanëve dhe demokratëve, sidomos për çështje që lidhen me shpenzimet në sektorin e shëndetësisë dhe politikat e imigracionit. Secila palë akuzon tjetrën për bllokimin e procesit, ndërsa negociatat e fundit kanë dështuar të sjellin një zgjidhje.
Nuk është ende e qartë se sa do të zgjasë kjo mbyllje, por analistët paralajmërojnë se ndikimi ekonomik mund të jetë i konsiderueshëm, sidomos nëse situata zgjat më shumë se disa ditë. Agjencitë qeveritare kanë nisur zbatimin e planit të emergjencës, ndërsa qytetarët dhe bizneset po përgatiten për ndërprerje të mundshme të shërbimeve dhe pasiguri të zgjatur.
Kjo është një zhvillim që i shton trysninë jo vetëm sistemit administrativ amerikan, por edhe ekonomisë globale, në një kohë kur SHBA përballet me polarizim të thelluar politik dhe tensione sociale në rritje.
