Nga Xhensil Shkembi
Irritim dhe trishtim
Në Bode të Lozhanit sot u vra polici Enea Mekolli dhe u plagos rëndë Edison Adri, nga Violand Bracellari. Ky i fundit vendoste kamera termike në pemë, stërvitej si ish-ushtarak duke bërë qitje dhe rriste qen duke i stërvitur për sinjalizim.
Ama, përtej ngjarjes së trishtë, më irriton kjo pamje me dron. Kjo është ferma që kishte krijuar autori i vrasjes së sotme. Shikojeni mirë. Gati gati kompleks. 100 lopë.
Kur unë në Vlocisht përpiqem të ndërtoj një kotec pulash, të dyndet policia, IKMT, shteti e bashkia sikur ndërtoj pallat. Kur ai fshatari i shkretë bën një avlli, e ngopin me gjoba.
Si shkuan materialet e ndërtimit aty lart kur Bracellari kishte 10 vite në kërkim? Si e ndërtoi gjithë këtë fermë? Kush ja merrte qumështin? Ku i siguronte lekët një njeri me rrezikshmëri të lartë shoqërore?
Kur e tërhoqi zvarrë në 2024 një person me kalë për 90 minuta dhe i’a dorëzoi policisë, si ka mundësi që policia nuk u mobilizua ta arrestonte? E kam ende denoncimin e Bezhanit që u rrah. Pastaj më kërcënonte mua.
Apo e ndihmoi shteti ta ndërtonte këtë fermë? Do e zbuloj unë, pa merak. Do ua nxjerr qumështin e nënës, për atë nënë që nesër do varrosë për herë të dytë një fëmijë të saj. Të madhin ja mori leuçemia ndërsa të voglin ja mori krimineli.
