Përpjekjet e disa vendeve perëndimore për të vendosur kufizime në çmimet e naftës ruse mund të çojnë në pasoja të rënda për tregun global të energjisë, tha presidenti rus Vladimir Putin në një bisedë telefonike me kryeministrin irakian Mohammad al-Sudani, njoftoi sot shërbimi për shtyp i Kremlinit.
“U diskutuan përpjekjet e disa vendeve perëndimore për të vendosur kufizime në çmimin e naftës së papërpunuar nga Rusia.
Vladimir Putin vuri në dukje se veprime të tilla janë në kundërshtim me parimet e marrëdhënieve të tregut dhe ka shumë të ngjarë të çojnë në pasoja të rënda për tregun global të energjisë”, thuhet në një deklaratë nga Kremlini, raportoi agjencia TASS.
Thuhet se Putin dhe Al Sudani në bisedë kanë dhënë një vlerësim pozitiv për aktivitetet në kuadër të marrëveshjes OPEC+.
Dy liderët diskutuan edhe për situatën në veri të Irakut, ndërsa gjatë shkëmbimit të mendimeve në lidhje me përshkallëzimin e tensioneve në veri të vendit, Kremlini deklaroi se Putin avokoi për zgjidhjen e çështjeve të reja me mjete politike dhe diplomatike.
Gjithashtu, Putin vuri në dukje marrëdhëniet konstruktive dhe miqësore midis Moskës dhe Bagdadit, ndërsa palët theksuan bashkëpunimin tradicionalisht miqësor dhe konstruktiv midis Rusisë dhe Irakut, duke shprehur vendosmërinë e tyre për të vazhduar forcimin e marrëdhënieve në fusha të ndryshme.
