Shumëgjuhësia, edukimi gjuhësor dhe dialogu ndërkulturor në BE” është një projekt i financuar nga BE me fokus te diversiteti gjuhësor i Bashkimit Europian, që po zbatohet nga Kolegji Universitar Wisdom.
Në kuadër të këtij projekti, gjatë ditës së sotme u organizua aktiviteti me temë: “Vlerat e Bashkimit Europian- Shumëgjuhësia si vlerë e BE-së”, ku morën pjesë profesorë, përfaqësues të medias, përfaqësues të OJF-ve dhe studentë, të cilë diskutuan për çështje që i takojnë shumëgjuhësisë dhe politikave gjuhësore të BE-së.
Debatin e drejtoi koordinatorja e projektit dr. Manjola Zaçellari, së bashku me prof.as.dr Lediana Beshaj, anëtare e projektit.
Rreth projektit
Moduli Jean Monnet “Shumëgjuhësia, edukimi gjuhësor dhe dialogu ndërkulturor në BE” ofron një pasqyrë të historisë, vlerave dhe rëndësisë së studimit të Bashkimit Evropian. Ai jep njohuri mbi strukturën dhe politikat e BE-së. Në mënyrë të veçantë, ai mbulon aspektet kyçe të politikës gjuhësore dhe edukimit gjuhësor në një numër shtetesh anëtare të Bashkimit Evropian dhe shtete të tjera
joanëtare, dhe analizon sfidat me të cilat përballet komuniteti evropian në zbatimin e politikave gjuhësore dhe arsimore. Më konkretisht, lënda analizon funksionet e institucioneve kyçe evropiane dhe shqyrton formimin dhe zbatimin praktik të mekanizmave mbrojtës për gjuhët zyrtare dhe jozyrtare brenda BE-së, me theks te gjuhët e pakicave dhe atyre autoktone. Për këtë qëllim, studentët do të kenë njohuri të thella rreth asaj çka BE-ja po bën për të promovuar shumëgjuhësinë, për të mbrojtur të drejtat gjuhësore të personave, për të luftuar diskriminimin ndaj njerëzve që i përkasin një pakice/grupi etnik si dhe respektimin e diversitetit kulturor, fetar dhe gjuhësor në Evropë. Kursi propozon një analizë të thellë të katër shtyllave qendrore të politikës gjuhësore të BE-së, që lidhen me planet gjuhësore të BE-së për të promovuar barazinë dhe përdorimin e gjuhëve evropiane si dhe mbrojtjen e gjuhëve të rrezikuara të Evropës; projektet evropiane për të rritur përfshirjen sociale të grupeve të pafavorizuara si dhe promovimin e të drejtave gjuhësore; iniciativa për të promovuar mësimin e të paktën dy gjuhëve të huaja nga qytetarët evropianë dhe promovimin e përkthimit dhe interpretimit si mjete bazë të komunikimit midis rajoneve evropiane.
