Prokuroria Speciale, SPAK, ka urdhëruar mëngjesin e kësaj të shtune arrestimin e disa zyrtarëve dhe ish-zyrtarëve të Ministrisë së Brendshme, të dyshuar për shpërdorim detyre dhe shkelje të barazisë në tenderin me vlerë rreth 25 milionë euro për veshje dhe këpucë të Policisë së Shtetit.
Hetimi ka nisur pas një denoncimi publik të Partisë Demokratike dhe më tej një kallëzimi formal nga deputetët në largim, Myslym Murrizi dhe Halit Valteri.
Mëngjesin e sotëm (10.07.2021), policia zbatoi urdhërat e prokurorëve speciale, duke arrestuar ish-drejtoreshën e Prokurimeve në Ministrinë e Brendshme, Edlira Naqellari, si edhe disa punonjës të nivelit të ulët, të cilët kanë zhvilluar dhe ndjekur tenderin e fituar në mënyrë të dyshimtë nga një bashkim operatorësh, të udhëhequr nga kompania “D&E”.
Pavarësisht se këto arrestime prishën qetësinë e fundjavës së nxehtë, hetimet e SPAK-ut treguan se prokurorët specialë ende nuk kanë guximin të arrijnë në nivelet e larta.
Të gjithë të dhënat e kallëzimit kundër këtij tenderi krijojnë dyshimet se pas shkeljes së barazisë së garës qëndron ish-Ministri i Brendshëm, Sandër Lleshaj dhe ish-Sekretari i Përgjithshëm i asaj ministrie, Plarent Ndreca.
Në kallëzimin penal, Lleshaj dhe Ndreca akuzohen si organizatorët e procedurës fiktive të tenderit 25 milionë euro, një projekt i zbatuar, sipas kallëzuesve, nga zyrtarët e prokurimeve, për të cilët kanë vendosur edhe emrat përkatës.
Të dhënat e kallëzimit duken se kanë qenë jo vetëm të mjaftueshme, por edhe të sakta, pasi në urdhërat e arrestit të lëshuar nga SPAK janë thuajse të gjithë emrat e akuzuar.
Të vetmit emra që nuk gjenden në listën e prokurorëve specialë, të paktën për momentin, janë Sandër Lleshaj dhe Plarent Ndreca.
Për momentin, nuk është e qartë nëse hetimet për këta dy personazhe, të cilët kanë pasur peshë specifike në përdorimin e fondeve të Ministrisë së Brendshme.
Megjithatë, duket se edhe kësaj radhe, SPAK-u nuk ka arritur të prekë majën e problemit.
Në orët dhe ditët në vijim, “burime nga prokuroria” do të përcjellin në media përgjime apo akte proceduriale hetimore, për të krijuar bindjen se tashmë koha e pandëshkueshmërisë ka përfunduar.
Por, “operacioni mediatik” me sasi, por jo me cilësi zyrtarësh nën hetim, mund të shërbejë vetëm si nxitje për “mbështetësit e SPAK-ut” që të tregojnë edhe njëherë se drejtësia e re po funksionon, pavarësisht se hetime të ngjashme janë zhvilluar prej vitesh./BoldNews
