Leja talibane për gratë që punojnë në Afganistan nuk ka zgjatur shumë. Një zëdhënës i grupit militant kërkoi që gratë të qëndrojnë në shtëpi dhe të mos dalin në punë.
Publikisht, arsyetimi i zëdhënësit për këtë vendim nuk lidhej me ideologjinë e grupit, por ai citoi “arsye sigurie”.
“Është një masë e përkohshme”, tha zëdhënësi i talebanëve, Zabihullah Mujahid në një prononcim për Reuters.
Siguria e grave, sipas zëdhënësit, kërcënohet nga vetë ushtarët talebanë.
“Forcat tona të sigurisë nuk janë të trajnuara se si të sillen me gratë dhe disa as se si të flasin e komunikojnë me to. Deri kur të kemi kontrollin dhe sigurinë e plotë, u kërkojmë grave që të qëndrojnë në shtëpi”, tha zëdhënësi.
OKB ka deklaruar se ka raportime nga burime të besueshme të abuzimit të talebanëve me gratë dhe kufizime ekstreme ndaj tyre.
