Kreu i grupit parlamentar të PS, Taulant Balla është paraqitur sot në Gjykatën e Posaçme në lidhje me padinë ndaj Berishës për shpifje, pasi ky i fundit e akuzoi për vrasjen e Ravik Gurrës.
Në daljen para mediave, Balla tha se Berisha duhet të mësohet të shkojë në gjykatë e të respektojë ligjin. Po ashtu u shpreh se duhet të përgatitet se në GJKKO do të jetë klient i përhershëm.
“Është një vepër penale që duhet ndëshkuar. Edhe Bashën kam arritur ta fitoj gjyqin për shpifje do fitoj dhe me Berishë.
Thirrja ime për GJKKO është që Berisha duhet të mësohet të vijë për çështjet që e kemi thirrur ne por edhe për çështjen që e kanë thirrur shqiptarët, ndër to 21 janari, Gërdeci, privatizimi i OSSH, privatizimi i kompleksit Partizani.
Berisha duhet të bëhet gati që të jetë klient i përhershëm. Kam bërë padi për disa akuza të paqena në Kuvendin e Shqipërisë”, tha Balla.
Duke qenë se mungoi sot në seancë, gjykata vendosi që ta shtyjë gjyqin në mënyrë që palët të paraqiten në procesin gjyqësor.
Sali Berisha e ka akuzuar Taulant Ballën për përfshirjen në eleminimin e avokatit Ravik Gurra.
“Je akuzuar për porositje vrasjesh dhe se ke fshirë regjistrimet, prokurorin që fshiu regjistrimet e ke graduar në detyrë. Dhe së bashku me ty në parlament sot është hija e të ndjerit Ravik Gurra që të kishte kapur në lidhje me bandat dhe në porosi vrasjesh dhe e eleminove”, është shprehur Berisha.
Edhe Floriana Garo është paditur pasi në deklaratat për media ka akuzuar Ballën si të përfshirë në bandat e Elbasanit.
