Tre të rinj janë arrestuar nga Policia e Durrësit, pasi akuzohen për shitje të lëndëve narkotike.
Bëhet me dije se në pranga kanë rënës shtetasit: Renato Leci, 21 vjeç, Elvis Leci, 19 vjeç dhe Endri Mezhika, 22 vjeç, banues në Xhavzotaj, Durrës.
Nga veprimet hetimore, rezulktoi se të tre këta shtetas shisnin doza të lëndës narkotike kokainë, në zonën e plazhit, në qytetin bregdetar.
Njoftimi i Policisë:
Durrës
Finalizohet pas një muaj hetimesh me metoda proaktive, operacioni policor i koduar “Periudha”, për goditjen e një rasti të shitjes në doza, të drogave të forta.
Vepronin si grup për të shitur doza të lëndës narkotike kokainë, në zonën e plazhit, kapen dhe vihen në pranga 3 shtetas.
Sekuestrohen një sasi lëndë narkotike kokainë e ndarë në dhjetëra doza, një peshore elektronike dhe 3 celularë.
Në kuadër të intensifikimit të kontrolleve dhe aksioneve të Policisë në zonën bregdetare të qarkut, me qëllim parandalimin dhe goditjen e paligjshmërive dhe si rezultat i një hetimi njëmujor me metoda proaktive, të iniciuar nga Policia e Durrësit dhe të kryer në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Durrës, është organizuar dhe finalizuar operacioni policor antidrogë i koduar “Periudha”.
Në bazë të provave të siguruara, specialistët e Seksionit për Hetimin e Narkotikëve dhe Trafiqeve të Paligjshme të DVP Durrës, në bashkëpunim me shërbimet e Forcës së Posaçme “Shqiponja” të kësaj drejtorie, kapën dhe vunë në pranga shtetasit R. L., 21 vjeç dhe E. L., 19 vjeç (kushërinj), të dy banues në Arapaj, Durrës, si dhe shtetasin E. M., 22 vjeç, banues në Xhavzotaj, Durrës.
Nga veprimet hetimore dyshohet se këta 3 shtetas vepronin në formën e një grupi, me qëllim sigurimin dhe shitjen në doza, të lëndës narkotike kokainë, në zonën e plazhit të Durrësit. Gjatë kontrolleve, këtyre shtetasve iu gjetën dhe iu sekuestruan në cilësinë e provës materiale, një sasi lëndë e dyshuar narkotike kokainë e ndarë në dhjetëra doza të gatshme për shitje, një peshore elektronike dhe 3 celularë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
