Zëdhënësi i Ministrisë së Jashtme iraniane, Nasser Kana’ani ka reaguar në lidhje me aksionin e policisë shqiptare në kampin e muxhahedinëve në Manzë të Durrësit.
Në deklaratën e tij, Nasser Kana’ani nënvizoi se Shqipëria duhet t’i marrë seriozisht kërcënimet që mund t’i vijnë nga organizata e MEK-t.
“Elementet e grupit terrorist anti-Iran Mojahedin-e Khalq, i njohur si MEK do të përbëjnë gjithmonë një kërcënim për sigurinë e nikoqirit të tyre për shkak të natyrës së tyre terroriste. Shpresojmë që qeveria shqiptare të kompensojë gabimin e saj në pritjen e këtyre terroristëve”, shkroi Kana’ani në Twitter.
Kujtojmë se pas një urdhëri të lëshuar nga SPAK, efektivët e policisë ushtruan kontrolle në kampin e MEK në Manzë. Por kontrollet e efektivëve hasën në rezistencën e muxhahedinëve, duke detyruar policinë të përdorte gaz lotsjellës.