Politikologu nga Prishtina, Behlul Beqaj, profesor universitar, ndërroi jetë sot në moshën 65-vjeçare. Njerëz që e njihnin dhe miq të shumtë kanë shprehur ngushëllimet e tyre në rrjetet sociale, duke ndarë dhimbjen me familjen beqaj.
I trishtueshëm ishte ky lajm edhe për redaksinë e KDPOLITIK.COM, portal për të cilin kontribuonte edhe Behlul Beqaj.
Si redaksi Ju shprehim ngushëllimet më të sinqerta familjes Beqaj, kurse lexuesve tanë ua sjellim sërish intervistën e fundit, të dhënë para disa muajsh.
***********
KDP: Zoti Beqaj, cili është vlerësimi juaj për këtë vit (2021). Cilat ishin dritëhijet e tij në Kosovë dhe për Kosovën?
BEQAJ: Ky vit mund të vlerësohet si vit i shpresës së ndryshimit të madh dhe zhgënjimit të vazhdueshëm për shkak të mospërmbushjes së pritjeve të fryra dhe gabimeve amatoreske siç ishte vendosja e tiketës prej pesë eurosh për veturat që e kanë kryer kontrollin teknik, apo shkarikimet an blok të bordeve, ambasadorëve, në kundërshtim me ligjet dhe pa vlerësuar perfomancat individuale!
KDP: Si e vlerësoni shkëlqim – rënien e Vetëvendosjes së z. Kurti: fitoi bindshëm zgjedhjet parlamentare dhe – humbi bindshëm garën për pushtetin vendor?
BEQAJ: Përgjysmimi i elektoratit është pasojë e shumë faktorëve, por para së gjithash përceptimit të gabueshëm të vullnetit politik të votuesve që votuan ndryshimin e madh në shkurt të 2021 nga ana e Albin Kurtit dhe Vetëvendosjes. Ata përvetësuan fitoren plebishitare e cila në fakt ishte aproksimativisht 50 % reagim i zhgënjimit ndaj ish-pushteteve, ndërsa vetëm 50% mbështetje ndaj Albin Kurtit dhe Vetëvendosjes që shihet në faktin se i njëjti elektorat e përgjysmoi pas tete muajve mbështetjen ndaj kandidatëve të Vetëvendosjes në zgjedhjet lokale që ishin më shume loajal ndaj Kurtit sesa personalitete që mbështeten nga mjediset e veta.
KDP: Nga ky këndvështrim, cilat janë problemet dhe sfidat kryesore të Qeverisë Kurti? Është folur e debatuar shumë për prioritetet e politikës kosovare. Zoti Kurti dialogun me Serbinë e ka vendosur diku nga mesi, për të mos thënë nga fundi i objektivave të tij, ndërkohë që realiteti imponon të kundërtën. Përse?
BEQAJ: Fillimisht, Albin Kurti gabimisht e ka kuptuar mesazhin dhe vullnetin politik të trupit zgjedhor. Vetëvendosja e ka përvetësuar fitoren plebishitare sikur të ishte meritë ekskluzive duke anashkaluar pakënaqësinë e akumuluar të qytetarëve me pushtetet e kaluara që krijuan klimën e domosdoshmërisë së ndryshimit të madh. Qytetarët kanë votuar aq kundër pushteteve të kaluara sa kanë votuar për fituesin e zgjedhjeve të shkurtit, kjo shihet nga rezultati i përgjysmuar në zgjedhjet lokale të tetorit, përkatësisht nëntorit të vitit 2021.
Se dyti, pushteti i Albin Kurtit ka krijuar qasje joreale ndaj problemeve reale të brendshme dhe atyre të jashtme. Pushteti plebishitar ka injoruar shëndetin dhe jetën e qytetarëve gjatë periudhës së përshkallëzimit të pandemisë së koronavirusit duke i dhënë përparësi interesit ekonomik. Në një moment ishim kampion bote (gusht – shtator 2021), sipas numrit të të vdekurve dhe te infektuarëve nga Covidi 19! Dhe, përderisa po përballeshim me eskalimin e pandemisë, Albin Kurti shkon në Shqipëri për të mbështetur degën e VV –së në zgjedhjet e atjeshme nacionale duke i dhënë përparësi ambicjes lideriste gjithëkombëtare na raport me problemin jetik te brendshëm…!
Se treti, Albin Kurti dhe pushteti aktual kanë sjellje arrogantë ndaj opozitës. Në vend se të krijojë kohezionin e domosdoshëm të brendshëm me opozitën, zoti Kurti ka provokuar me arrogancë opozitën edhe nga foltorja e Parlamentit duke thënë se opozita mbase nuk di as të kritikojë, se ai është i gatshëm ta mësojë opozitën, por paraprakisht duhet të ftohej prej tyre … ?! Për më tepër, ai nuk u kënaq me këtë, por në një rast tjetër opozitës nga foltorja i porositi: ”Mos më detyroni të shkoj në zgjedhje të reja se e dini çfarë … “(Ju pret), duke aluduar ne zgjedhjet kombëtare!
Së katërti, politika aktuale e Albin Kurtit ka vlerësim joadekuat dhe përgjegjësi ndaj kontekstit ndërkombëtare, veçmas ndaj administratës se re amerikane. Njëri nga dështimet më serioze të tij është vlerësimi i papjekur i kontekstit ndërkombëtar për zgjidhjen e mosmarrëveshjes mes Kosovës dhe Serbisë. Injorimi i kërkesave të administratës amerikane dhe BE për implementimin e Bashkësisë së Komunave me shumicë serbe të popullsisë me gjasë do të ndikojë vendosmërisht në karrierën e Albin Kurtit në të ardhmen dhe të VV-së, ngase rreth kësaj çështje do të “ndahet lumi“.
Së pesti, dështimi i plotë i kandidatëve të VV-së për kryetarë të komunave të Kosovës dëshmon faktin se përzgjedhja e kandidatëve ishte më shumë zgjedhje personale e z. Kurti sesa reflektim i mbështetjes së tyre nga qytetarët ku ata jetojnë.
Së gjashti, Lista ‘Guxo’ e znj. Vjosa Osmani që ishte partner zgjedhor në zgjedhjet nacionale, në zgjedhjet lokale përjetoi abort politik para fillimit të trye. Sinergjia në zgjedhjet kombëtare u shpartallua substancialisht në zgjedhjet lokale .
Fundja, AK dhe VV në zgjedhjet lokale nuk e patën mbështetjen masive të diasporës e cila përafërsisht ka marrë pjesë me 15.000 votues, ndërsa në zgjedhjet nacionale – me rreth 150.000 votues! Pra, sa ishte fitorja plebishitare meritë e Albin Kurtit, po aq përgjysmimi i elektoratit është përgjegjësi e dështimit të tij në zgjedhjet lokale.
KDP: Në fakt, cili është parashikimi juaj, a do të mbyllet çështja e dialogut Prishtinë-Beograd gjatë qeverisjes së zotit Kurti?
BEQAJ: Klima e krijuar,mjerisht më shumë është në favor të zgjedhjeve të reja sesa të mbylljes së dialogut mes Prishtinës dhe Beogradit. Nëse VV-ja dëshiron të mos e humbin mbështetjen tonë publike dhe shpresën për ndryshim të madh, Albin Kurti dhe LVV-ja duhet të ballafaqohen me shkaqet e brendshme të cilat i përmendi lideri i VV-së duke nisur nga përgjegjësia e tij dhe duke ruajtur ndershmërinë e cila deri më tashti nuk shkaktoi asnjë skandal të përmasave të mëdha, që ka qenë karakteristikë e përditëshme e ish-pushteteve.
KDP: Çfarë po ndodhë me opozitën kosovare: Fitorja në zgjedhjet lokale është rikëndellje e saj apo rezultatet janë pasojë e zhgënjimit të votuesve me Vetëvendosjen?
BEQAJ: Mendoj se fitorja e opozitës është pasojë direkte e keqmenaxhmit të politikëbërjes së pushtetit aktual dhe faktit se kandidatët më shumë kanë lënë pështypje se janë relativisht të pavarur nga partitë e tyre. Pushteti i VV-së që u arrit pas përpjekjeve rreth 15-vjeçare, u tretë për rreth tetë muaj!
KDP: Le të flasim pak për atë që quhet ‘Ballkan i Hapur’ apo zhgënjim i ballkanasve me procesin e integrimit në strukturat euro-atlantike. Kush Ka të drejtë – Vuçiq-Rama- Zaev, që po e sforcojnë këtë nismë apo Kurti-Gjukanoviq e Sarajeva- që e shikojnë me mosbesim?
BEQAJ: Albin Kurti ka arsye të qëndrueshme që ndërlidhet me statusin politik të Kosovës,për ta kundërshtuar këtë nismë, ndërsa të tjeret kanë arsye të tjera…Nuk kam dëshirë të përzihem në vendimet e shteteve të tjera ngase edhe Edi Rama ka të drejtë të jetë pjesë e “Ballkanit të hapur “, meqenëse atë e kanë zgjedhur dhe ai pergjigjet para elektoratit shqiptar, por ai nuk ka të drejtë të sillet si patron ndaj Kosovës. Nga ana tjetër, humbja e këtij rasti kur është koncentruar “artileria” më e rëndësishme diplomatike ndërkombëtare do të dëshmojë papjekurinë politike të palëve, të cilat ,si duket, jane shndërruar në pengje të populizmit!
KDP: Mendoni se gjatë 2022 do të kemi një mozaik të ri zhvillimesh politike në rajon apo vazhdim të status-quosë, si rezultat i ngathtësisë së politikanëve apo edhe i ndikimit të pandemisë së koronavirusit dhe krizës ekonomiko-sociale-energjetike?
BEQAJ: Nuk e kam ende të qartë nëse do të fitojë ‘artileria e rëndë ndërkombëtare diplomatiko-ushtarake’, apo liderët nacionalë në synimet e tyre anakronike për t’u imponuar si të pazavendësueshëm. Shpresoj se pas zgjedhjeve në Serbi, në muajin prill, do të kemi një situatë më të qartë, por zgjidhje s’do të kemi!
