Partia Demokratike ka paralajmëruar depozitimin ditën e sotme të një padie në adresë të amerikanes me origjinë shqiptare, Evis Kokalari, të profilizuar së fundmi si një “avokate” e Sali Berishës, të shpallur “non grata” nga SHBA.
Depozitimi i padisë ndaj Kokalarit ka ardhur si reagim i PD-së, pas deklaratave konsistente të saj ndaj kryetarit të PD-së, Lulzim Basha, deklarata të cilat PD i cilëson si përsëritje të shpifjeve të Edi Ramës dhe Taulant Ballës.
Teksti i reagimit të PD-së
Një spekulante politike, Evi Kokalari, guxoi sot të përsëriste përpara shqiptarëve shpifjet e Edi Ramës dhe Taulant Ballës ndaj Kryetarit të Partisë Demokratike z. Lulzim Basha. Autoritetet përgjegjëse me kërkesë të vetë Partisë Demokratike hetuan për 2 vite lidhur me shpifjen e Edi Ramës dhe Taulant Ballës, duke provuar në mënyrë ligjore dhe përfundimtare se ato ishin vetëm shpifje.
Ricikimi i të njëjtave shpifje, bëhet për të njëjtin qëllim, atë të mbajtjes në këmbë të regjimit kriminal të Edi Ramës. Për këtë arsye, Partia Demokratike do të padisë nesër penalisht për shpifje znj. Evi Kokalari, e cila mund të paraqitet në gjykatë për të provuar akuzat e rreme me dëshmitarët e saj të rremë Edi Ramën dhe Taulant Ballën.
