Dy ditë pas ndarjes nga jeta të artistit të mirënjohur, Sherif Merdani (lexoni Arti shqiptar humb një tjetër ikonë, Sherif Merdanin dhe “S’do të kisha zgjedhur kurrë një baba tjetër”, djali i Sherif Merdanit emocionon me fjalët për të atin). Kujto.al ka publikuar një pjesë nga rrëfimi prekës i djalit të xhaxhait të tij, Ylber Merdani, i cili tregon se si bashkë me Sherifin dërgonin të vëllain e tij në burg.
“Kishin arrestuar bashkëshorten e Qemalit, Yleme Merdanin ose nënën e Sherif Merdanit. Ylemeja, veç Sherifit, kishte edhe një fëmijë dy-tre muajsh, Meleqin, por askush nuk pyeti për këtë gjë. Njerëzit e sigurimit e morën me vete duke ia hequr djalin nga gjiri. Sherif Merdani dhe vëllai i tij, Meleqi, mbetën jetim.
Dy prindërit e tij ishin në burg. Vëllai i Sherifit, që ishte 2-3 muajsh, kishte nevojë për gji. Që nga arrestimi i nënës së tij, ai vetëm qante. Askush nuk ishte në gjendje ta pushonte. U mendua se çfarë mund të bëhej me këtë fëmijë dhe në mëngjes, nëna më tha mua dhe Sherifit, se duhej të merrnim fëmijën e vogël dhe ta çonim në burg, që nena t’i jepte për të pirë. Ashtu bëmë.
Unë dhe Sherifi ishim të vegjël, një pjesë të rrugës e merrte ai, ndërsa më pas e merrja unë. Meleqin e çonim tre herë në ditë në burg, ku nëna e Sherifit i jepte gji fëmijës. Për shumë kohë, Meleqi u bë vizitor i rregullt i burgut, deri sa një ditë një doktor, Selaudin Bekteshi kishte thënë: “Ose lironi gruan, ose çoni dhe fëmijën në burg, sepse në të kundërt fëmija mund të vdesë”. Fatmirësisht Ylemeja u kthye në shtëpi, ndërsa vazhdonte të mbahej në burg i shoqi”, -rrëfen djali i xhaxhait të të ndjerit.
Sherif Merdani lindi në Korçë, në vitin 1940. Pas Festivalit të 11 në RTSH, u arrestua. Gjykata e Rrethit të Librazhdit e deklaroi fajtor për “agjitacion e propagandë” dhe e dënoi me 10 vjet heqje lirie. Teksa po vuante dënimin në burgun e Spaçit, u ridënua me 10 vjet të tjera. U lirua në korrik 1989 pasi kish vuajtur për 16 vjet e një muaj në Spaç, Burrel e Qafë Bari.