Kreu i Grupit Parlamentar të Partisë Demokratike, Enkelejd Alibeaj do të zhvillojë sot një mbledhje me deputetët të cilët janë shprehur pro përfshirjes në procesin e zgjedhjes së presidentit.
Mbledhja është parashikuar që të zhvillohet në orën 10:30 dhe pritet që të diskutohet në lidhje me raundin e tretë për zgjedhjen e Kreut të Shtetit, i cili në fakt është dhe shansi i fundit për gjetjen e konsensusit mes palëve politike.
Raundi i tretë është caktuar për t’u zhvilluar më 30 maj në orën 10:00. Edhe në këtë raund, mazhoranca nuk do të paraqesë propozim të saj, duke i qendruar një marrëveshje të nënshkruar më herët me Alibeajn.
Dy raundet e parë kanë dështuar për shkak se nuk është paraqitur asnjë kandidaturë.
Pak ditë më parë, Alibeaj u shpreh se procesi është kthyer në farsë. Ai akuzoi socialistët për shkelje të marrëveshjes së arritur disa javë më parë.
Deputetët e Komisionit të Rithemelimit nga ana tjetër, kanë kërkuar që opozita të qendrojë jashtë të qenurit fasadë në zgjedhjen e presidentit të ri të vendit.