Kryeministri i Izraelit, Yair Lapid, paralajmëroi se bashkëpunimi ushtarak midis Rusisë dhe Iranit, lidhur me përdorimin e supozuar nga ana e Moskës të dronëve të prodhuar nga Irani për të sulmuar Ukrainën, përbën një rrezik global.
“Natyrisht, ne mendojmë se marrëdhëniet midis Rusisë dhe Iranit janë një problem serioz jo vetëm për Izraelin, por edhe për Ukrainën, Evropën dhe gjithë botën”, tha Lapid sipas gazetës “The Times of Israel.
Lapid shtoi se është “absolutisht e papranueshme” që Teherani ka dhënë dronë për trupat ruse.
“Irani është një shtet i rrezikshëm terrorist dhe fakti që Rusia bën biznes me të rrezikon të gjithë botën”, shpjegoi kryeministri i Izraelit.
Nga ana tjetër, Lapid nuk përmendi kërkesën e Kievit për sistemet e mbrojtjes ajrore për t’u mbrojtur kundër lëshimeve të raketave ruse që kanë rënë në disa qytete të Ukrainës ditët e fundit.
Ministri izraelit i Mbrojtjes, Benny Gantz, ka deklaruar vazhdimisht se Izraeli nuk do të dërgojë sisteme armësh në Ukrainë.
Këtë të hënë, zëvendësdrejtori i Këshillit të Sigurimit rus dhe ish-presidenti rus, Dmitri Medvedev, siguroi se çdo furnizim “i pamatur” i pajisjeve ushtarake nga Izraeli në Ukrainë “do të shkatërrojë të gjitha marrëdhëniet ndërshtetërore midis vendeve tona”.
Që nga fillimi i luftës në Ukrainë, Izraeli është përpjekur të mbajë një pozicion neutral, ndërsa ka ofruar mbështetje morale për Kievin, por futja e dronëve iranianë në ushtrinë ruse ka ndryshuar pozicionin e Izraelit.
