Nga Ylli Asllani-
Kryebashkiaku Dhionis Kotmilo (Berti), u shua sot në Korçën e tij të dashur!
Ai e priti i vetëm në strehën e tij ndrimin e jetëve, por i rrethuar nga respekti dhe dashuria e bashkëqytetarëve të vet që e donin dhe vlerësonin pa masë!
Pata fat të më konsideronte mik të ngushtë!
Ishim kryebashkiakë demokratë në të njëjtën kohë, në dy qytete simbol të kulurës shqiptare! Në atë rrokopujë të 97-tës vraponim bashkë në kërkim të projekteve dhe mbështetjes për qytetet tona!
Sjell ndërmend sa u lumturua për vëmendjen e Dojçe Bank për Ujësjellësin apo për një projekt ndriçimi të USAID për Bulevardin e Korçës! Drita është ogur i mirë në këtë errësirë, më tha.
Berti ishte model i qytetarisë, profesionistit dhe humorit korçar!
Një herë, pas mandatit na takoi miku ynë shefi USAID-it Howard Sumka… Ku jeni tani bre kryetarë, tha dhe shtoi, besoj në aftësitë tuaja, ju keni qenë ‘tigra’ në krye të bashkive…! Po e vërtetë, ‘tigra’ kemi qenë i tha Berti me shpoti, por kemi qenë tigra cirku. Këta tigrat e pyllit socialist janë të pamëshirshëm…!
Në të gjitha takimet me ndërkombëtarët, Berti shquhej për finesën dhe klasin intelektual, por dhe për sarkazmën ndaj pamundësisë financiare që na shoqëronte në mandatin dhe jetën e përditshme. Ta dinë këta, që ne që kapërdisemi kështu nuk na del as rroga për të shtyrë muajin, le që as nga privatizimi i ushqimores që punuam tërë jetën nuk fituam gjë, shprehej jo pa dhimbje!
Ky ishte i miri Berti Kotmilo, inxhinieri me botë të pasur shpirtërore dhe kokën plot me ide, te cilin korcarët dhe pse e ngritën në piedestal, ai ngeli përherë thjesht Njeri!
Do ta kujtoj sa herë të shkoj në Korçën e tij që e deshi aq shumë e do lutem përherë që shpirti tij të pushojë në paqe e dritë të ketë përjetë!
