Patriarku Kirill i Kishës Ortodokse Ruse, i afërt me presidentin rus Vladimir Putin, ka punuar për shërbimet e inteligjencës sovjetike gjatë qëndrimit të tij në Zvicër në vitet 1970, raportuan mediat zvicerane të hënën, duke cituar arkivat e deklasifikuara.
Sipas gazetave të përditshme Le Matin Dimanche dhe Sonntagszeitung, një dosje e mbajtur nga policia federale për njeriun që aktualisht është kreu shpirtëror i Kishës Ortodokse Ruse konfirmon se Kirill ishte pjesë e KGB-së, shërbimi i inteligjencës së huaj të epokës sovjetike.
Sipas AFP, dy media arritën të shqyrtojnë dosjen në Arkivin Federal të Zvicrës.
Në fillim të viteve 1970, patriarku, i cili mbështet pushtimin rus të Ukrainës, jetoi në Gjenevë për të përfaqësuar zyrtarisht Patriarkanën e Moskës në Këshillin Ekumenik të Kishave.
Misioni i Kirillit, emri i koduar i të cilit ishte “Mikhailov”, ishte të ndikonte në atë këshill.
Qëllimi i sovjetikëve në atë kohë ishte të detyronin institucionin e Gjenevës të shpallte dënime kundër Shteteve të Bashkuara të Amerikës dhe aleatëve të saj dhe të zbuste kritikat për mungesën e lirisë fetare në BRSS, kujtojnë gazetat e përditshme.
Nën kontrollin e rreptë të KGB-së’
Gazetat zvicerane shtuan se Kisha Ortodokse Ruse refuzoi të komentojë mbi aktivitetin e supozuar të spiunazhit të Kirillit në Gjenevë dhe Këshilli Ekumenik i Kishave u tha mediave zvicerane se nuk kishin “asnjë informacion” mbi këtë temë.
Le Matin Dimanche foli me nipin e patriarkut, Mikhail Gundiaev, i cili e pasoi atë si përfaqësues i Patriarkanës së Moskës në Gjenevë, dhe i cili pretendon se xhaxhai i tij “nuk ishte agjent, megjithëse ishte nën kontroll të rreptë të KGB-së”.
Kjo “nuk ndikoi në sinqeritetin e angazhimit të tij për punën ekumenike me kishat e tjera,” tha ai për gazetën.
Ai shtoi se Patriarku Kirill e vlerëson veçanërisht Zvicrën.
“Kam ndjenja të veçanta për vendin tuaj. Nga të gjitha vendet e botës, ky është ndoshta ai që kam vizituar më shpesh”, tha patriarku në vitin 2019, duke pritur presidentin e Dhomës së Lartë të Parlamentit Zviceran në Moskë.
