Nga Bahri Cani-
SHPËRNDAJE: Të gjithë ju që duhet të udhëtoni nga Austria nëpër Hungari, apo nga Hungaria nëpër Austri kujdes: Austria do të ndërmarrë masa drastike dhe do të mbyllë kufijtë me Hungarinë dhe Sllovakinë. Nga e shtuna nuk do të mund të kalohet më në 24 vendkalime. Do të mbeten të hapura vetëm disa kalime, por me kontrolle të rrepta. Masa mbrojtëse duhet të zbatohet deri më 20 maj, raportojnë mediat gjermane.
Arsyeja është frika nga një shpërthim i madh i sëmundjes Afta Epizootike (FMD).
Kjo sëmundje është përhapur aktualisht në Hungari dhe Sllovaki. Nga e shtuna do të mbyllen 24 pika kufitare me vendet e prekura. Ndërsa në vendkalimet që do të mbeten të hapura për udhëtime, do të kryhen kontrolle të rrepta.
Austria do të ndalojë importin e kafshëve dhe produkteve shtazore, nga këto vende, duke përfshirë bagëtinë, derrat, mishin e freskët, qumështin e papërpunuar dhe mishin e gjahut.
