Nga Ermal Peçi-
Arrestimi i Ergys Agasit nuk është thjesht fundi i një arratie. Mund të jetë fillimi i një historie shumë më të madhe. Një historie me shumë pjesë, të cilave dikush, herët a vonë, do t’u duhet të japë përgjigje.
Rreth emrit të Agasit janë mbledhur prej kohësh disa prej elementëve më të debatueshëm të politikës shqiptare: biznesi, lejet e ndërtimit, pushteti, influencat e botës së krimit dhe, së fundmi, dosja e tenderave të AKSHI-t. Fuqizimi i Agasit u bë pikërisht gjatë qeverisjes së Edi Ramës.
Pikërisht këtu nis pyetja që e bën këtë arrestim politikisht më të rëndësishëm: a është Ergys Agasi thjesht një person në një dosje, apo një hallkë e një mekanizmi më të gjerë ku politika, biznesi dhe bota e krimit kanë gjetur një pikë takimi?
Kjo pyetje nuk është krijuar sot. Ish-zëvendëskryeministri Arben Ahmetaj, në një intervistë për programin investigativ italian Report të Rai 3, e ka akuzuar publikisht Agasin se shërbente si “koordinator” mes Edi Ramës dhe grupeve kriminale. Ahmetaj ka pretenduar gjithashtu se grupe kriminale përfitonin tendera dhe se paratë pastroheshin në Shqipëri.
Janë akuza politike dhe publike që duhen trajtuar si të tilla, jo si fakte të provuara.
Në publik janë shfaqur gjithashtu pamje ku pretendohet se automjetet e Agasit lëviznin në eskortën e kryeministrit Edi Rama. Edhe ky është një element që kërkon shpjegim. Nëse një person pa një funksion të përcaktuar shtetëror shfaqet në një kontekst të tillë, pyetja është e thjeshtë: pse?
Dosja e Akshit është një kapitull tjetër, ku SPAK ka njoftuar se hetimi përfshin dyshime për konkurrencë të paligjshme përmes dhunës, heqje të paligjshme të lirisë, shkelje të barazisë së pjesëmarrësve në tendera, korrupsion, pastrim të produkteve të veprës penale dhe grup të strukturuar kriminal.
Prandaj, kjo nuk është më historia e Agasit, por është historia e një rrjeti të madh, fijet e të cilit lidhen tek karrigia e Kryeministrit. Pikërisht këtu lindin pyetjet që kërkojnë përgjigje: Kush vendoste? Kush përfitonte? Kush garantonte? Dhe, mbi të gjitha, kush komunikonte me kë?
Por, për ta kuptuar më mirë këtë rrjet dhe shtrirjen e tij, ka edhe një detaj tjetër që e bën këtë histori edhe më interesante.
Agasi u arrestua në prani të një ish-zyrtarit të lartë të Policisë së Shtetit.
Natyrisht, prania e një ish-zyrtari nuk provon në vetvete asnjë lidhje kriminale. Por, në një histori ku prej kohësh flitet për influencë, akses dhe ndërmjetësim, kjo marrëdhënie është një tjetër pikëpyetje që kërkon shpjegim.
Pikërisht këtu lind pyetja më intriguese: a e ka shitur dikush Agasin?
Është vetëm një hipotezë, jo një fakt.
Por në botën e pushtetit, biznesit dhe krimit, marrëdhëniet nuk janë gjithmonë të përjetshme. Interesat ndryshojnë, aleancat thyhen dhe njerëzit që dikur ishin të dobishëm mund të kthehen në një rrezik.
Nëse Agasi ka pasur vërtet aksesin dhe influencën që i është atribuar publikisht, atëherë është e vështirë të imagjinohet se rënia e tij mund të kuptohet vetëm përmes një emri.
Dikush mund të ketë folur. Dikush mund të ketë dhënë informacion. Dikush mund të ketë vendosur se Agasi nuk ishte më i dobishëm.
Por këtë nuk e dimë.
Ajo që dimë është se arrestimi i tij hap një kapitull të ri. Nëse pas këtij arrestimi do të ketë zhvillime të tjera, atëherë historia mund të mos ndalet te Agasi.
Në fund të fundit, pyetja nuk është vetëm çfarë ka bërë Agasi.
Pyetja është se ku të çojnë fijet e rrjetit që qëndron pas tij.
Kush ishte Ergys Agasi në të vërtetë në raport me pushtetin, biznesin, Policinë e Shtetit dhe botën e krimit?
Nëse përgjigjet gjenden, atëherë arrestimi i tij do të ketë qenë vetëm dera hyrëse në një histori shumë më të madhe, sepse ndonjëherë më i rëndësishëm se njeriu që bie, është sistemi që e mbajti në këmbë.
