Policia e Kenias ka nisur një hetim pasi një punonjëse e BBC u gjet e vdekur në një hotel në Nairobi, kryeqyteti i Kenias. Bëhet fjalë për britaniken Kate Mitchell, e cila punonte për “BBC Media Action” në disa vende afrikane. BBC Media Action ka në fokus përdorimin e medias dhe komunikimit për të trajtuar pabarazinë në mbarë botën. Gjithsesi nuk mendohet se vdekja e Mitchell ishte e lidhur me punën e saj për organizatën.
Dhe ndërsa rrethanat e sakta të vdekjes së saj mbeten të paqarta, policia u tha mediave lokale se po e hetonin atë si një vrasje dhe po mundohen të gjejnë motivet e mundshme. Ndërkohë dritarja e dhomës së saj në katin e tetë ishte e thyer dhe trupi i një burri që kishte qenë më herët me të u gjet përtokë jashtë hotelit.
