Jemen- Rasa Abdallah, gazetarja 27-vjeçare shtatzënë u vra gjatë rrugës për në një spital të Adenit në Jemen, kur një pajisje shpërthyese e vendosur në makinën e burrit të saj i cili edhe ai ishte gazetar shpërtheu.
Bomba ishte vendosur në makinën e bashkëshortit të gruas fatkeqe, i cili po ashtu është gazetar. Çifti po nxitonte për në spital, pasi 27-vjeçarja do të lindte fëmijën e tyre të dytë, raportojnë mediet vendase.
“Bomba shpërtheu ndërsa gazetari Mahmoud al-Atmi e çoi gruan e tij, Rasa Abdallah, në spital për të lindur”, tha një zyrtar. Dy gazetarët kanë punuar për media të ndryshme vendase dhe ndërkombëtare në gjuhën arabe.
Sipas disa banorëve të zonës, në makinë përveç saj dhe bashkëshortit ( i cili u plagos) ka qenë edhe fëmija i tyre i parë, i cili gjithashtu ka humbur jetën nga shpërthimi. Megjithatë ky informacion nuk është konfirmuar ende.