Ditën e martë, 74 deputetët e partisë në pushtet, zbatuan aktin kolektiv të urdhëruar nga i pari i Partisë së tyre Edi Rama, për të dorëzuar zarfet me nga tre emra kandidatësh të propozuar për të qenë kandidatura garuese për President të Republikës. Një akt ky i shitur si standart demokracie por që nuk është veçse tallja e Ramës..
Tallja tjetër e Ramës me këtë populizëm, është detyrimi që deputetët të mos deklarojnë emrat e tyre në zarfet me propozime, kur sipas Nenit 87 të Kushtetutës, propozimet për emrin e Presidentit, qofshin 1, 2 apo 3 të tillë, bëhen publikisht nga 20 deputetë, të cilët dorëzojnë në kuvend listën me emrat e tyre.
Në rastin konkret, Rama po i përdor deputetët si fasadë të “gjoja marrjes së mendimit nga populli”; kur në fakt, as vetë deputetët nuk i ka zgjedhur populli e nuk janë përfaqësues të tij, mbasi janë caktuar me listë nga Rama dhe klanet e tij oligarkike e mafioze.
Ky aktrim i Bablokut, me populizmin grotesk të propozimeve për President Republike, është si demagogjia që propagandonte dhe zbatonte ish-kupola e regjimit komunist, maskuar pas parullës: “Populli vendos, partia zbaton”.
Me këtë lojë për kandidaturën e Presidentit, Edi Rama na kujton Sekretarët e Parë të Partisë para vitit ‘90, të cilët u kërkonin banorëve të çdo zone, të bënin propozimet e tyre për kandidatin që donin deputet në Kuvedin Popullor.
Por ato propozime, nuk i lexonte askush dhe hidheshin në koshin e plehrave, mbasi emrat i caktonte Byroja Politike në Tiranë, ndërsa populli bindej, mbyllte gojën dhe shkonte votonte e brohoriste për udhëheqësin e madh.
Dhe Edi Rama, të martën mblodhi zarfet me propozimet e 74 deputetë-mumje të tij, por nuk do t’i hap fare, do t’i hedh në koshin e plehrave dhe do veprojë si te ajo shprehja: “Pyeti 7 a 8 dhe do caktojë atë që do vet”. Ndërsa deputetët do ta votojnë me përulje.
Patjetër që do kemi një president tjetër më 24 korrik, por kandidimi i tij, po bëhet nëpërmjet një procesi komik, dukshëm degradues i parlamentit e Kushtetutës dhe poshtërues për deputetët e PS, i inskenuar qëllimisht nga kryeministri Edi Rama./Pamfleti-Titulli dhe redaktimi janë të ArberiaNews.net//
