Kancelari gjerman Olaf Scholz mohoi një luftë të mundshme tregtare me Kinën e shkaktuar nga BE-ja me hetimin e saj për subvencionet për automjetet elektrike kineze, ndërsa bëri thirrje për tregje të globalizuara me një fushë loje të barabartë për të gjithë pjesëmarrësit.
”Ne duam t’i shesim makinat tona në Evropë, në Amerikën e Veriut, në Japoni, në Kinë, në Afrikë, në Amerikën e Jugut, kudo. Por kjo do të thotë se ne jemi gjithashtu të hapur për të blerë makina nga vende të tjera për tregun gjerman. Ka makina gjermane në Kore, makina koreane në Gjermani. Cili është problemi?”, tha Scholz, siç raporton Bloomberg.
Ai paralajmëroi se “masat mbrojtëse” të BE-së mund të dëmtojnë industrinë vendase dhe tha se ishte “e qartë” se nuk do të kishte luftë tregtare midis BE-së dhe Kinës.
Sipas agjencisë, Kina fillimisht reagoi në mënyrë agresive ndaj njoftimit të Presidentes së Komisionit Evropian Ursula von der Leyen për hetimin e subvencioneve më 13 shtator, duke e quajtur atë një “akt të zhveshur të proteksionizmit”, i cili ngriti shqetësime brenda BE-së për një luftë të mundshme tregtare.
Gjatë vizitës së Komisionerit Evropian të Tregtisë Valdis Dombrovskis në Pekin javën e kaluar, qeveria e Presidentit Xi Jinping shmangi retorikën që mund të kërcënonte marrëdhëniet ekonomike prej 900 miliardë dollarësh, ndërsa nënpresidenti He Lifeng ra dakord të ngrinte disa grupe pune, duke përfshirë ato për shërbimet financiare dhe tregtinë. njofton agjencia.
