Pak ditë më parë në SPAK u mor në pyetje shefja e Departamentit te Epidemiologjisë në Institutin e Shëndetit Publik, Silva Bino. Mësohet se SPAK po heton një tender me vlerë rreth 1 milionë euro për dezinsektimin e mushkonjave në vitin 2019.
Sipas Euronews, për këtë çështje përveç Silva Binos, SPAK ka marrë në pyetje edhe 4 zyrtarë e ish-zyrtarë te tjerë të ISHP, mes tyre shefen sektorit te dezinfektimeve.
Hetimi për këtë tender ka nisur pas kallëzimit të një prej kompanive ofertuese të asaj kohe e skualifikuar nga gara.
Sipas burimeve dyshimet janë se anëtarët e komisionit të vlerësimit të ofertave për këtë procedure prokurimi kanë favorizuar kompaninë fituese duke e kualifikuar pa plotësuar kriteret e vendosura.
Zbatimi i kësaj kontrate 2 vjeçare ka përfunduar dhe tashmë nuk është lidhur asnjë kontratë e re për dezinsektimin e mushkonjave prej vitit 2021, pasi ISHP ka kërkuar që tenderin ta zhvillojë Agjencia e Blerjeve të Përqendruara pranë Ministrisë së Brendshme, e cila nga ana saj ka kërkuar të rishikohen specifikimet teknike.
