Ministria e Punëve të Brendshme në Mal të Zi ka njoftuar se autoritetet po kryejnë një hetim pasi më 31 korrik kryeministri i vendit, Dritan Abazoviç mund të ishte përballur me një aksident si pasojë e mosfunksionimit të sistemit të frenimit në makinën shtetërore.
Ngjarja ka ndodhur në Obzoviç teksa makina ishte rreth 50 metra përpara një rruge tatpjetë në momentin që u zbulua problem me sistemin e frenimit.
Abazovic ishte nisur për një vizitë zyrtare në Tivat dhe në momentin kur u zbulua problem me makinën, automjeti me të cilin po udhëtonte kryeministri u zhvendos në anë të autostradës.
Më pas kryeministri i Malit të Zi ka përdorur një tjetër automjet për të vazhduar udhëtimin.
Ministria e Punëve të Brendshme në Podgoricë ka treguar se nga hetimet e deri tanishme është zbuluar se bëhet fjalë për një problem teknik të automjetit për shkak të vjetërisisë së tij dhe kilometrave të shumta.
