Eksperti i sigurisë, Fatjon Softa thotë se njoftimi i amabasadës amerikane, sipas së cilës, qytetarët shqiptarë që duan të denoncojnë trafikun e drogës se tashmë kanë një linjë të re kontakti me DEA-n, vjen pasi është humbur besimi te institucionet.
Në një intervistë për Euronews Albania, Softa u shpreh se efektivët dekonspirojnë operacionet e policisë, por edhe atyre të organizuara nga SPAK-u.
Softa përmendi rastin e të shumëkërkuarit, Ervis Martinaj, ku policia nuk arriti ta arrestonte, pasi ai u informua për lëvizjet e tyre.
“DEA është në kuadër të Interpol dhe Europol dhe në të gjitha rastet duhet të punojnë dhe të bashkëpunojnë me policinë dhe institucionet shqiptare. Humbja e besimit është ajo që ne kemi thënë. Sa raste ka pasur, qoftë edhe në operacionet e organizuara nëpërmjet SPAK-ut, një rast i Martinajt, dekonspirimi ka qenë që në momentet para fillimit të operacionit, në momentin e lokalizimit të zonës, nuk është arritur arrestimi i personave me shkallë të lartë rrezikshmëri sepse kanë qenë të dekonspiruar”, tha eksperti.
